الأحد، 8 مارس 2009

التاج اللى بيخلينا نفضفض

بسم الله الرحمن الرحيم
فكرة الاسئلة والتاج دى جميلة جدا وانا قريتها فى مدونات كتير قبل كده وباسئلة مختلفة
وبصراحة هى من اجمل الاشياء اللى موجودة بالمدونات لانها بتقرب من وجهات نظر بين الاصدقاء المدونين وكمان بتعرف الاخرين على شخصية الشخص المدون .. فكرت كتير اجاوب على تاجات كتير بس ترددت لكن دلوقتى عاوز اتكلم شوية فضفضة
انا اخذت التاج ده من اختى الصغيرة ( صدى الصمت)
هابدء الرد بدون تقيد باسلوب ثقافى ولا علمى هاخليها تلقائية كده وارتجالية لانى باعتبر التلقائية والارتجالية بتوضح اكتر او بالاصح بتعبر اكتر عن اللى جوانا
معلش انا يمكن اطول شوية علشان عاوز افضفض
- لو كان ينفع تختار عصر تعيش فيه هيبقى انهى؟ ومين الحاكم؟
- بصراحة مش مهم العصر اللى احنا بنعيشه المهم احنا هنعمل فيه ايه وهنقدر نثبت وجودنا ازاى وازاى نضع علامة تمييز لانفسنا بالعصر اللى احنا فيه وبصراحة رغم انى كتبت مرتين فى جريدة القوات المسلحة وكمان مرتين فى جريدة الوطن هنا بالسعودية لكن انا لسة لحد دلوقتى معملتش حاجة تثبت ولا تظهر ليا لكنى ان شاء الله ناوى بس امتى مش عارف ادينى باحاول
- إيه اكتر حاجه بتحبها فى رمضان؟
- رمضان شهر امة رسول الله محمد صلى الله عليه وسلم امة الاسلام فطبيعى تكون الروحانيات لها الاولويات وربنا يقدرنا على انن نقدر نقرب من ربنا اكتر فى كل لحظة بتمر علينا بحياتنا مش رمضان بس
- اوصف أجمل فطار ممكن تفطره؟
- بصراحة انا باحب الاكل قووووووى يعنى كل انواع الاكل ممكن اكله هههههههه بس باموت فى المكرونة البشاميل واللحوم والحاجات الحلوة يعنى بينى وبينكم مش باعتق باكل صح هههههه
- لو انت حاكم هتكون عادل ؟ وهتعرف ازاى ؟
- بصراحة اكتر وظيفة بابعد عنها هى الحاكم لانها من اصعب ما يكون بجد ورغم انى اكون حاكم عادل حتى يظلنى الله يوم لا ظل الا ظله لكن معتقدش فى حاكم عادل فى العصور بتعتنا دى ؟ هاعرف ازاى انى حاكم عادل اكيد من المحكوم عليهم بالاعدام لما يقول ربنا ياخدك ههههههههههههه ، مهما الحاكم عمل عمايل كويسة بنظر الاخرين برده مش هيبقى عادل لان كل واحد عاوز حاكم تفصيل على مزاجه
- مين أكتر اعلامى بتحبه؟
- فيه اعلاميين كتير بيعجبنى اسلوبهم فى الحوار مثلا تامر بسيونى وعلاء بسيونى وفيه كتير غيرهم بس مش فاكر اسمائهم لكن برده فيه اعلاميين بيظهرو على الشاشة ملهمش فى البطيخ خالص ياريتهم يقعدو جانب الحائط احسن بدل ما هما بيقرفونا بموضوعات بايخة وسخيفة وغير مفيدة
- لو ممكن شغلانه تانيه تختار ايه؟
- انا حاليا محاسب ومدير مالى لمدارس انترناشيونال ولكن بجد لو فيه شغلانة تانية لي اتمنى اكون فنان " رسام " لانى باعشق الرسم البروتريهات وكان زمان بياخد وقتى كله لكن ظروف الحياة اختلفت دلوقتى وبعدت شوية عنه بس لسة بارسم
- تانى بلد تحب تعيش فيه بعد مصر
- تانى بلد اللى انا فيها دلوقتى مش علشان الناس اللى فيها لا لا لا ؟ علشان ارضها المقدسة والبيت الحرام والمسجد النبوى ربنا يديمها علينا نعمة
- اوصف ترتيبات أجمل فرح ممكن تحضره؟
- بصراحة انا مليش فى مواضيع الافراح لانى بجد بانحرج جدا يعنى لو حضرت مناسبة فرح بافضل اقعد فى جانب بعيد عن الهيصة والليصة ههههههه اعمل ايه بس مش متعود على الرقص والكلام الفاضي ده
- بتراعى كلام الناس والقيل والقال؟ وليه؟
- اعتقد مفيش انسان مش بيحط اعتبارات لكلام الناس والقيل والقال واللى يقول غير كده يبقى بصراحة كذاب لانها طبيعة بشرية لكن الزمن اللى احنا فيه ده اصبح القيل والقال زايد عن اللزوم لدرجة انه اصبح مؤذي جدا ؟ وعلى فكرة سبب زعلى الفترة دى هو القيل والقال ده لما واحد مصري يذهب مخصوص لصاحب العمل مثل ويتكلم عنى باسلوب غير لائق ومن الطبيعى ان الراجل يسمع لكلامه لكن المشكلة ان صاحب العمل انصدم لما شاف منى رد فعل معاكس اولا متكملتش عن الشخص الاخر الا بالخير ثانيا لاول مرة يشوفنى متنرفز وصوتى عالى لانى مش باحب حد يتعامل معايا باسلوب تعالى مهما كان هو والاهم اللى فهمته له ان طلبى الوحيد اثناء الاتفاق على العمل معه هو الاحترام المتبادل وليس المقابل المادى
- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
- سؤال صعب حاليا معدش ينفع نرجع لورا هنتعب احنا فى عصر التكنولوجيا والانتر نت وبعدين لو مفيش نت هاكلمك ازاى واعرف تعليقاتكم يبقى مينفعش نستغنى عن الكمبيوتر ولا الموبايل ولا الكاميرا ولا اى حاجة تانية .. خلينا كده احسن واللى عنده جديد يقدمه بدل مترجعونا لزمن اللازمن
- لما بتحب تهرب من كل حاجه بتروح فين ؟
- سؤال ذكى جدا .. زمان كنت افضل الوحدة والانطواء واحب اقعد لوحدى كتير لكن دلوقتى لا .. ولكن لما بجد باحب اهرب من كل حاجة باروح لناجى نفسه واقعد معه واكلمه واساله واتفاهم معه وكتير باوصل معه لحلول
- امتى أول مره أخدت فيها نفس وقلت ياااااااه أنا كبرت؟
- كتير اخدت نفس من الطفولة ومنذ تحمل المسؤلية يمكن وانا عمرى 10 سنوات وبعدها حتى الان وانا باخد نفس عميق واقول ياااااااااااااااااااااااه انا كبرت قووووى
- بتشرب سجاير ولا لا؟ وايه رأيك فى الرجاله والستات اللى بتشرب؟
- سجاير مين بس ... دا انا بادوخ من الميه الساقعة .. بجد لو حصل وحد شرب جانبى سجاير باتضايق جدا وممكن اطلب منه يطفي السيجار او ابعد عنه انا ... باعتبر اللى بيشرب سجاير سواء رجل او ست انه بيهرب من حاجات بحياته وبدل ما يولع فى نفسه بيولع فى السيجارة ههههههه عادة سيئة جدا وكمان حرام .. وبعدين ايه الستات التعبانة اللى بتشرب سجاير هتستفيد منها ايه ولا هو تقليد اعمى للرجالة وخلاص .. طيب دول رجالة تعبانة .. خليكم انتم يا ستات حلوين والتزمو شوية هيبقى انتم والرجالة
- بتعرف ايدك الشمال ازاى؟
- اليمين باكل بها .0 لكن لما بالخبطهم فى بعض مش باعرفهم من بعض ههههههههه
- اكتر موسيقي واغانى ومطربين بتحبها ؟
- الموسيقى الهادئة وباعشق ام كلثوم ونجاة وعبدالحليم والاغانى القديمة وفيه من الجديد شباب كويس وكلماتهم حلوة زى كاظم الساهر اللى باسمعه دلوقتى و تامر حسنى ومش فاكر برده كم واحد تانى لكن البنات اللى بتطلع الفترة دى مش باحبهم بجد لانهن مش طالعين يظهرو طرب دول طالعين يظهر ترب ههه
- ليه الذوق والنخوه اتعدموا؟
- بصراحة فيه ناس كتير عندها ذوق ونخوة لكن ظروف المعيشة والحياة والخوف من المجهول بيخلى الناس تخاف اكتر على لقمة العيش لكن لو حبينا نعرف ان فيه نخوة ولا لا نقدر نخرجهم بجد باى وقت ..
- ايه الحاجه اللى لو حصلت هتبقى سعيد ؟
- يمكن اللى يقرا الاجابة دى يستغرب الحاجة اللى لو حصلت هابقى سعيد " انى اضحك من قلبى بجد " اضحك لما اشوف كل شئ حولى كويس وحلو ومفيش فيه غلط ؟
- تحب أرض زراعيه ولا اجنس عربيات ولا كام عماره ولا فلوس فى البنك؟
- بصراحة عاوزهم كلهم ههههههه لكن عاوز الاهم والاغلى من كل ده واللى مش بيتقدر بثمن عاوز الاحساس عاوز المشاعر الصادقة من صديق ، من حبيب اعتقد كتير زيي عاوز كده
- تركب مركب ولا طياره؟
- باخاف اركب الاثنين ههههههه يعنى المركب يبقى خلاص السمك هيلاقى اكله .. والطيارة ممكن اقع منها انزل على الارض متكسر هههههههههههه ركبت المركب ولسة الطيارة يمكن اركبها قريب
- شخص مجنون ولا عاقل؟
- طبعا مفيش حد بيقول على نفسه مجنون لكن انا باقول انا مجنون حب .. مجنون فن .. مجنون عشق ، ايه ياعم كلام الجنان ده . مفيش عندك عقل خالص ههههههههههه ياعم فيه بس لما تحس بجد انك مجنون فى الزمن اللى احنا فيه ده يبقى انت اكبر العاقليين
- تقرا كتاب ولا تتفرج على فيلم ؟
- ايه السؤال الغريب ده معقولة كده .. طبعا اتفرج على فيلم ههههههههههههه
- التاج لمين؟
- التاج لمن يجرؤ فقط

32 التعليقات:

نفرتارى يقول...

اوووووول تلعيق .

نفرتارى يقول...

كل سنة وانت بخير .. جميل اووووى ردك على اخر سؤال التاج لمن تجرؤ فقط .

تحياتى ،،


نفرتارى

ذو الوجه المبتسم يقول...

نفرتارى
كل عام وانت بخير
نورتى مدونتك التانية
بس هو اللى لفت نظرك هو اخر سؤال بس هههههههه
اتمنى تكرار الزيارة
تقبلى تحياتى

صدى الصمت - عاشقة الورد - يقول...

أنا سعيدة جداً إن حضرتك قبلت دعوتى ورديت على التاج
والحقيقة إجاياتك واضحة وصريحة وصادقة جداً وعملت قيمة وأهمية كبيرة للتاج
أما بالنسبة لتأكيد كلمة التعليقات فالخطوات هى :

إدخل فى لوحة التحكم الرئيسية ثم إختار إعدادات ثم إذهب الى (إظهار التحقق من الكلمات للتعليقات)
وإختر كلمة(لا)بدل(نعم)ثم قم بخطوة الحفظ
إنتهى .

تحياتى

marmar يقول...

كل سنه وانت طيب يا فنان
واجاباتك عل تاج كلها جميله وواضحه وصريحه فعلا ما شاء الله عليك تبارك الرحمن
وربنا يديم عليك وعلى كل الامه العربيه والمسلمه الخير دايما يارب
تقبل تحياتي

ذو الوجه المبتسم يقول...

صدى الصمت
نورتينى
اشكرك على تعليقك الرقيق
انا نفذت اقتراحك
ياريت تتاكدى منه
على فكرة ؟؟
عندى اقتراح عاوز اطرحه على المدونيين الاصدقاء
هو عمل مدونة مجمعة
بس لسة بافكر فى الشكل العام لها وازاى ننفذها
تقبلى تحياتى

ذو الوجه المبتسم يقول...

marmar
اهلا بك فى مدونتك التانية
نورتينى
اتمنى تكرار الزيارة
واشكرك على تعليقك الرقيق
تقبلى تحياتى

Unknown يقول...

الاجابات حلوة اوى فيها اللى بشترك معاك فيها(بس باموت فى المكرونة البشاميل )زىىىىىىىىىبالظبط:)
وياريت تشوف لنا حد يعملنا
صنيييييييييييييييييييييه
ندخل بيها جينز ريكوررد.
لكن برضه فيه حاجات بختلف معاك فيها
مثلا ترتيبان الفرح الكويس فى رأيك
بصراحة يعنى مفروض العروسين يوفروا فلوسهم لحاجة اهم لان عمر ما حد حيشكر فى فرح حد تانى؟
تحياتى لك فى الغربة
وربنا يردك لبلدك
سالم غانم إن شاء الله
ويابختك ياعم بمجاورة
المسجد الحرام والمسجد النبوى.

Unknown يقول...

وإذا كان على الجراءة
فالحمد لله هى جت لى من
زمان وجاوبت التاج
حتى بدون ان يطلب منى
لان فعلا اسئلته كانت
مختلفة عن غيره.

ذو الوجه المبتسم يقول...

norahaty
كل سنة وانتى طيبة
ايه يابنتى الجرائة دي كلها
وساكتة ليه بس
اشكرك على تعليقك الجميل اللى بجد خلانى اضحك كتير
ان شاء الله لما ارجع مصر هاعزمك على مكرونة بالبشاميل ولحم وشوية تحابيش
بخصوص ترتيبات الفرح بينى وبينك محبتش اتكلم عنها لان فيه ناس بتزعل ولما تقولى لوحدة كبرى دماغك وبلاش فرح كبير ومصاريف على الفاضى .. تقول هو انا هافرح كم مرة بالعمر ومش عارفة ان الراجل بيطلع روحه علشان يجهز شوية عفش او دهان شقة او الحاجات البسيطة التانية .. ماهى لو طلعت ولد كانت عرفت ههههههههههههههه
بجد انا سعيد بزيارتك وبخاصة ان تعليقك وصلنى وانا داخل المدونة
تقبلى تحياتى اختى الصغيرة

صدى الصمت - عاشقة الورد - يقول...

أيوة يا أفندم كدة تمام قوى والتعليق أصبح سهل جداً
أنا كنت محرجة والله وأنا بأقترح على حضرتك ولكن دة لمصلحة المدونة وشكلها العام
وبالنسبة لإقتراح مدونة جماعية
فهى فكرة جميلة جداً
بس والله خايفة أقولك بس هأقولك
إن الإقتراح دة تم تنفيذة بالفعل
من 10 أيام فقط
والمدونة إسمها ملتقى الصحبة وهدفها إن المدونين يتجمعوا فى وقت واحد يحددوة مسبقاً ويتم التعارف والمناقشة عن طريق الشات
لينك المدونة هو :

http://agabnee.blogspot.com

ولو إقتراحك مختلف
ياريت تعرض الفكرة ويدرسها أصدقاء المدونة
تقبل إحترامى وتحياتى

عاشقة الورد

salma mohamed يقول...

يابخت حضرتك,
ليه لانك عايش في البلد اللي اتولدت وعشت فيها نص حياتي,ياعالم انا عاوزه اروح مكة اللي اتربيت فيها,
وعلى فكرة انا مشتركة معاك في كذا حاجة,
والمكرونة بالباشميل من الاكلات اللي بحبها جدا,بس في العموم موضوع الاكل مش في دماغي اوي,
وكمان بيتهيالي فعلا ان اغلب الناس عاوزه مشاعر وصديق وحبيب قريب اهم من اي حاجة تانية,
معلش طولت ولا قولت عاى اللي جايه علشانه,وهو اني اشكر حضرتك على زيارتك لمدونتي البسيطة,
اسعدتني زيارتك وشرفني تعليقك.

شمس النهار يقول...

الحقيقه انا بعتبر التاج ده زي السي في اللي بيعرفنا ببعض اكتر
وبالرغم انه متعب شويه بس لطيف

Beram ElMasry يقول...

اخى وحبيبى الجميل جدا . ذو الوجه المبتسم
السلام عليكم ورحمة الله وبركاته
بارك الله فيك وفى اهلك وكل من احببت ودمت فى سرور
اسعدتنى زيارتك وسرنى تعليقك
ثانيا اسف جدا على التاخير .. ماكنش والله العشم تبعد وتهجرنى
ثالثا اقول تاتا تاتا خطى العتبة ولا اقول يلا بسرعة .... قول ايدى فى ايدك تسير والمولى راعينا
وتأكد ان شاء الله هيجى يوم ونقوم ونصحصح ... طيب حتى نتمطع
ذو الوجه المبتسم ...... انت جميل فاعذرنى فى تاخر الرد واعلم ان نظرى ضعيف ويلازمنى صداع مستمر وهو المعوق لى
لك تحياتى والسلام عليكم ، ولا سلام مع اليهود

سلوى يقول...

فكرتني بالتاج ده
أنا جاوبته من فترة:)

إجابتك بسيطه وتلقائيه

ربنا يوفقك ويحفظك

موناليزا يقول...

أعتقد ان الاجابة بتدل على شخصية مرحة يعنى اختيار الاسم"ذو الوجه المبتسم" موفق جدا
بما انك فى اجمل مكان على وجه الارض ممكن طلب؟
ممكن اول ماتزور قبر الرسول صلوات الله وسلامه عليه تدعيلى بأن ربنا ينصرنى ويرضى عنى
عارفة انها اول زيارة ليا فى مدونتك وبايخة انى اطلب منك حاجة بس من عشمى :)

ذو الوجه المبتسم يقول...

اختى الصغيرة صدى الصمت او عاشقة الورد
مش عاوز اسمع منك كلمة محرجة دى تانى
هو فيه احراج بين الاخ واخته ههههههه
انتى تامري
اما بالنسبة لفكرة المدونة الجماعية فانا فكرتى مختلفة فعلا لانى دخلت المدونة اللى كتبتى عنوانها ولقيت فيها من افكارى لكن ليست كلها
مش عاوز اتسرع فى عرض المدونة الجماعية وافكارها الا بعد الاعداد لها
تقبلى تحياتى

ذو الوجه المبتسم يقول...

الاخت سلمى محمد
شرفتينى بزيارتك
واتمنى تكرريها
وبعدين ايه اللى طولتى ده
يا سيدتى انتى تقولى اللى تحبيه
دى مدونتك
بخصوص الاماكن المقدسة اللى هنا
عاوز اقول رايي
كلنا بنتمنا زيارة الاماكن المقدسة والتعبد فيها لاننا بنحس بمشاعر القرب من الله واحنا بداخلها
لكن ده ميمنعش ان اى انسان فى اى مكان او اى بلد ممكن يكون اكثر تعبدا لله واكثر قربا لله بدون الزيارة
ادعو الله ان تكونى قريبا ببيته الكريم وتدعو لى معاكى
بس اوعى تنسي تدعى لى
تقبلى تحياتى

ذو الوجه المبتسم يقول...

شمس النهار
اقول لك على حاجة
بجد لما باشوف تعليقك باحس ان الشمس طالعة
حتى لو بالليل
ههههههههههههههههههه
اتمنى انك تتابعى موضوع المدونة الجماعية وفكرتها
لانى ارشحك من القائمين عليها انتى وعاشقة الصمت ومعنا من يريد الانضمام الينا فى المرحلة القادمة ان شاء الله
تقبلى تحياتى

ذو الوجه المبتسم يقول...

حبيب قلبى بيرم المصري
تعرف بجد زيارتك دى بتحسسنى بحاجات كتير
باحس بقيمة فنية
بتاريخ مصر
باحاسيس انسان صادق مع نفسه ومع غيره
ربنا يخليك لينا يا ؟؟؟؟
مش عارف القبك بايه ..... عاوز اختار لقب يليق على انسان عظيم مثلك
خلينى افكر وعدين اقول لك
مؤقتا تقبلى تحياتى
على فكرة كنت عاوز اميلك على اضيفك عندى .... ممكن ؟

ذو الوجه المبتسم يقول...

الزميلة الجميلة سلوى
طبعا فى البداية اهلا وسهلا بك فى مدونتك التانية
ثانيا احنا محاسبين زي بعض
بس هنا بلاش لغة الارقام
اصلها بتتعب ههههههههه
مرة تانية اهلا بك واتمنى تكرار الزيارة
تقبلى تحياتى

ذو الوجه المبتسم يقول...

الاخت موناليزا
مرحبا بك فى بيتك
زيارة عزيزة عليا بجد
احنا شرقاوية زي بعض
انا اول ما قريت تعليقك دعيت لك ربنا يوفقك بحياتك
لكن لفت نظرى شئ برده
احس فيه شئ مؤلم بحياتك
بدون تدخل منى
ارجو من الله ان ينصرك ويهديكى ويوفقك الى ما يحبه ويرضاه
وان شاء الله اول زيارة لمكة هيكون دعاء مخصوص باسمك
تقبلى تحياتى

صبرني يارب يقول...

تاج جميل ربنا يكرمك يارب

ونورتنا يا فندم بزيارتك

والنصحيه من عنينا يعنى بس هما ما بيسمعوش الكلام الستات

وبعدين بلاش نصايح مني انا ههههههههههههههههههههه

ذو الوجه المبتسم يقول...

صبرنى ياربى
شرفتينى بزيارتك
وبعدين ايه حضرتك دى
هو فيه واحدة تقول لاخوها حضرتك
هههههههههههه
متنسيش النصيحة
والله انا محتاجها قوووووووى
ويارتها تسمعها منك
مع ان شكلك غيورة قوووى على زوجك
هههههههههههه
تقبلى تحياتى

Remas يقول...

اخى ذو الوجه المبتسم
ابتسم لانى لسا عايشة وحماتى مش قلتلنى لسا
اجاباتك على التاج جميلة فعلا وحسيتها صادقة
وبجد موضوع زميلك المصري اللى اتكلم عليك دا مع صاحب العمل عجبنى فيه جدا رد فعلك انك مش اتكلمت عليه ولم ترد له صنيعه بالمثل وانفعالك على صاحب العمل كان في رايي مش تسرع بالعكس دا كويس اوى لان للاسف اصحاب الاعمال بيعتقدو دائما ان المصري دا خاضع دائما وانت بتصرفك كبرت نفسك وعرفته ان المادة لا تهمك والكرامة هى الاهم .
اما بالنسبة للمصريين في الخليج فللاسف في كتير منهم هما اللى بيعطو هذه الصورة السيئةعنا بتصرفاتهم وكرههم لبعض
ومش عارفه دا ليه
انا طبعا شفت دا بعينى لانى كنت عايشة هناك
انا اسفه طولت اوى عليك بس حبيت اقول رأيي في حاجة شفتها
ربنا يوفقك ويحميك من كل حاسد وحاقد

Unknown يقول...

بسم الله الرحمن الرحيم
السلام عليكم ورحمه الله وبركاته...
الهجره حلوه ...لكن العوده أحلــــــي...
راجع بمشروع أتمنى تشاركوني فيه...

Waleed Atya يقول...

نعم ما يخرج من القلب يصل الى القلب
انا حاسس بيك عشان نفسى اكلم و افضفض ذيك با مش قادر
على العموم لو اختارت عصر اعيش فية هيكون عصور الدولة العباسية و الفترة دية الى هى من حوالى 1200 سنة تقريبا
لانة اكثرة حضارة وثقافة وعلم وفوق كل ذلك اكثر قوة من و الوضع الحالى

Unknown يقول...

الأستاذ/ناجي..
ذو الوجه المبتسم ( الصبوح )
الفكره فكرتك والخطوه الجايه ...خطوتك.
انا سعيد جدا بمدونتك...وبصداقتك...
مثلي الأعلي في الصداقه ...أعظم صداقه في تاريخ الأنسانيه ...صداقه ( الصادق و الصديق ).
لا يمكن تتكرر...تكون حلمن وأملنا...والنور اللي بيدلنا..
في انتظار مشاركتك في فكرتك.

ذو الوجه المبتسم يقول...

شمس الحرية
اهلا بك .. شرفتنى
اشكرك على تعليقك
واتمنى لو انك تفضفض بجد حتى لو بينك وبين نفسك
تقدر تكتب احساسك بورقة وبعدين قطعها
المهم بجد انك تخرج كل اللى جواك

ذو الوجه المبتسم يقول...

اخى العزيز عصفور مهاجر
اشكرك جدا على كلماتك الجميلة
وان شاء الله تكون بداية معرفة وصداقة جادة وصريحة
ان شاء الله سوف ارسل لك اقتراحاتى لانشاء المدونة الجماعية
مش مهم مين اللى يعملها
المهم عندى انها تفي بالغرض
ونحس بجد اننا بنقدم شئ يستحق
مش مجرد كلام وخلاص
تقبل تحياتى

Unknown يقول...

اجابات حلوة ومشوقة
خلتنا نتعرف عليك اكتر وعلى الاكلات اللى بتحبها
ممكن طبق مكرونة معاك ؟؟
بجد تاج حلو
ربنا يوفقك ويجاوبة اللى شايف ان عندة جرئة على الاجابة
تحياتى

ذو الوجه المبتسم يقول...

نهر الحب
انتى تشرفينى طبعا
بس لو عاوزة ناكل مع بعض طبق مكرونى
يبقى انتى اللى تعمليه بايدك
ههههههههههههه
ولا انتى خايبة فى الطبيخ
ان شاء الله لما ارجع مصر تعزمينى عليه
وهاقول رايي بصراحة فى طبق المكرونى بتاعك
تقبلى تحياتى