الثلاثاء، 9 نوفمبر، 2010

اثار مصر تحت الميكرسكوب العالمي

السلام عليكم ورحمة الله وبركاته
اخواتى واخواتى واصدقائي المدونين وحشتوني
اولا :كل سنة وانتم بخير - عيد اضحى مبارك عليكم جميعا
ثانيا باعتذر عن فترة غيابي الطويل وده كان غصب عنى بسبب عودتى الى مصر من السعودية نهائيا لاسباب لا داعي لذكرها
ثالثا الموضوعات كتير لكن انا حبيت اكتب فى الموضوع ده بالذات وهو الاثار المصرية القديمة لان الموضوع اصبح منتشر بشكل غير طبيعي وبيحصل فيه حاجات غريبة جدا
قبل عودتى لمصر كنت اسمع ان فيه اثار مصرية قديمة الناس بتبحث عنها تحت الارض وحتى كان فيه بعض المشاهد بمسلسل الحارة بخصوص الموضوع ده
بالنسبة لى انا شخصيا شفت الموضوع ده بيحصل عندنا بالبلد والغريب مش البحث عن الاثار لكن الغريب مين اللى بيبحث لدرجة ان الناس فى البلد كان ممكن تقتل بعضها بسبب البحث عن الاثار ومع ذلك لسة مفيش شئ ظهر ومنهم نقب وحفر لكن بدون جدوى وخسارة فلوس ومصاريف وخلاص ومنهم سمعت انه وجد اثار وباعها بالفعل
كل ده طبيعي
لكن اللى مش طبيعي وده هو سؤالى
هى الاثار دي من حق مين ؟؟؟؟؟
ومين اللى بيشتريها وبيبعها بره البلد ؟؟؟؟؟
طيب وليه كل ده ؟؟؟ مش بلدنا احق بكل الثروة دي ؟؟؟
طيب لو الدولة هى اللى نقبت ووجدت الاثار ؟ ياترى الاثار دي عائدها بيعود على مين وبيروح فين ؟؟
ياترى الناس اصبحت تبحث عن الاثار بسبب الفقر اللى هما شايفينه وقلة الحيلة ؟
بصراحة اسالة كتير جدا ؟؟
ودي بعص صور الاثار الفرعونية القديمة
وعلشان محدش يفكر ان دى صور الاثار اللى انا لقيتها ولا حاجة ههههههههههه
انا جبتها من النت يا جماعة واوعى حد يبلغ عنى ههههههه


يا عم ابو الهول : متقلقش دورك جي قريب ॥ هتتسرق يعنى هتتسرق
كل عام وانتم بخير










13 التعليقات:

mrmr يقول...

الف حمد الله بالسلامه يا ناجى

ياذو الابتسامه الجميله

موضوع الاثار ده موضوع مش جديد لكن السبب الوحيد اللى الكل بيسعى اليه هى الظروف المنيله بستين نيله اللى مصر عايشه فيها
الكل بيدور على تحسين مستواه المالى
علشان يقدر يكفى بيته واولاده ويوفر ليهم القوت الضرورى
بس فعلا اسئلتك جميله محتاجه اجابات كتيره
ياريت حد من الحكومه يجاوب عليها علشان نعرف الاثار دى بتروح فين والعائد بتاعها ليه الشعب مش بتستفيد بيه

تقبل مرورى وحمد الله بالسلامه مره اخرى

ذو الوجه المبتسم يقول...

mrmr

كل سنة وانت بخير

موضوع الاثار موجود فعلا من زمان لكن مش بالدرجة اللى شايفها الفترة دي لانها بشكل ملحوظ جدا لدرجة ان فيه ناس بسطاء سابو شغلهم وراحوا يبحثوا عن الاثار فى اماكن مجهولة

نورتينى وشرفتينى
لك خالص تحياتى

شمس النهار يقول...

حمد الله علي السلامة

كلنا غبنا ورجعنا تاني

حمد الله علي السلامة الي ارض الوطن كمان

كنت متوقعه رجعوك مصر من كام بوست قريته

وعلي فكرة مش كل المصريين اللي بيعرفوا يعيشوا في الغربه ويتكيفوا مع الجو المحيط

بالنسبه للأثار ده موضوع شغال من زماااان الزمان
مش بس بيحفروا علشان ياخدوا الاثار ده المتحف المصري نفسه بيتسرق

كل سنه وانت طيب

كلمات من نور يقول...

الحمدلله عالسلامه يا ذا الوجه المبتسم

سعيدة لعودتك .أما آثارنا فالبركة في وزرائنا بقى والأخ حواس اللي طلع محتاس يتكلم من أمام ابو الهول وينادي لمحاربة الفقر و إلا ستصيبنا لعنة الفراعنة .............حسبي الله ونعم الوكيل

re7ab.sale7 يقول...

مساء الورد ...دي اول زيارة لي برغم اني لما دخلت المدونة حسيت اني دخلتها قبل كدة ...مش متأكدة.....
حمداللله بالسلامة رجوعك لبلد ...
بالنسبة للبوست دي بقت حاجة غريبة فعلا ومنتشرة بشكل غريب ...اقولك حاجة وتضحكش وتقو اني عبيطة ...عندنا بيعملوا اية ...؟ بيطلعوا الاثار دي بالجن...!! آه والله ومش عارفة ازاي بس سمعت الموضوع كتير جدا جدا وكنت اتمني اعمل موضوع عنه بما اني صحفية يعني لكن بابا حلف بأغلظ الايمان ما انا خارجة م البيت يومها وراحت علي المغامرة الصحفية ....
تحياتي ...وحمدالله بالسلامة مرة تانية...
آه نسيت اقولك لي اصحاب كتييير جدا من الشرقية بس من الزقازيق مش بلبيس ...اتشرفت بمعرفتك واهلا بكل اهل الشرقية

ذو الوجه المبتسم يقول...

اختى شمس النهار

نورتينى

كل سنة وانتى بخير

تحياتى لك

ذو الوجه المبتسم يقول...

اختى كلمات من نور

نورتينى

الله يسلمك ودعواتك انى استقر بقي فى مصر

جميلة جملة حواس احتاس هههه
هو احتاس واحنا كمان احتسنا معه ومع غيره ... ربنا يرحمنا

تحياتى لك

ذو الوجه المبتسم يقول...

re7ab.sale7

اهلا بك رحاب نورتى وشرفتى المدونة

وحظى انا اللى كويس انى لسة راجع بعد غياب عن التدوين

انا الاسعد بالتعرف على صحفية مميزة مثلك وان شاء الله ساكون متواجد بمدونتك باستمرار

بالنسبة لاستخدام الجن لاستخراج الاثار فده فعلا حقيقي

تقبلى تحياتى


تحياتى لك

جايدا العزيزي يقول...

الف حمدالله على السلامه

والله عندك حجق فى كل كلمه

ولو ماكنش ابو الهول كبير

كان اتسرق من سنين

موضوع فى الصميم

واشكرك على الزيارة

والمره الجايه جايدا العزيزى

تحياتى

rovy يقول...

كل عام و انت بكل الخير اخى الفاضل و أسرتك الكريمه و كل أحبابك ..عيد اضحى سعيد .. أسعدك الرحمن و جعل كل أيامك أعياد ..

صدى الصمت - عاشقة الورد - يقول...

ياااااه
أخيراً رجعت للتدوين
إحنا كنا إفتكرناك نسيتنا خلاص
حمدلله على سلامتك مرتين
مرة لرجوعك التدوين
ومرة لرجوعك لبلدك بالسلامة
وبالنسبة للموضوع ال إنت طرحتة فعاوزة أقولك إن التنقيب على الآثار تحت البيوت القديمة إنتشر قوى وكتير بأسمع من أصدقائى عنه وطبعاً أى حد بيلاقى أى قطعة آثار مابيبلغش عنها وبيتصرف فيها فى الخفاء
تحياتى وكل عام وانت بألف خير

Noha Saleh يقول...

سمعت كتير عن ناس وقعت بيوت بسببهم علشان بيحفروا ويدوروا على اثار وناس تانية ماتت تحت التراب بعد ماانهار عليهم النفق اللى بيحفروه
انا شايفة ان المفروض الحاجات دى بتاعة البلد يعنى بتاعتنا كلنا
مش من حق حد يبيعها وياخد ايرادها لنفسه
هو فى حد ممكن يبيع الهرم لحسابه
مثلا؟

بنوتة مصرية يقول...

كل عام وانت بخير