الثلاثاء، 11 أغسطس، 2009

وجوه متعددة

هو الانسان منا ينفع يكون له كم وجه علشان يعيش فى الزمن ده ؟؟؟

بصراحة مش عارف اقول ايه بجد
المفروض ان اليوم يوم البهجة زي ما شفت فى معظم المدونات
لكن بالرغم ان ذو الوجه المبتسم يكون مفروض اول واحد يبتسم
الا انى بجد مش عارف ليه حاسس بمضايقة وزهقان

تذكرت امبارح المواقف والمشكلات اللى كانت بتواجهنى فى العمل
ولما فكرت فيها مش عارف . ياترى انا غلطان ولا ايه
ياترى بجد الطيبة فى الزمن ده اسمها ساذاجة
انا مش ساذج ولا عمرى كنت ساذج ابدا
يمكن متسرع شوية فى اتخاذ القرار وبالرغم ان القرار الحمد لله بيكون صح بنسبة كبيرة
الا نى بابص حواليا مش شايف غير ناس كل همها المصلحة حتى الاقرباء والاصدقاء

ابسط مواقف حصل قريب جدا هنا معى بالسعودية

فيه بوست نزلته من فترة عن المحاسب القانونى عصام الراجل الكبير اللى عمره فوق ال 70 سنة
وكنت بجد مبسوط بمزحه وكلامه وكنت باضحكه بجد الا انى اكتشفت شئ طبعا مش غريب قوى
بعد يومين من المراجعة على حساباتى والحمد لله شغلى 100 % صح
مش هاحكى تفاصيل قوى عن خلافى البسيط معه لقيته مرة واحدة واقف من على الكرسي وطلب انه يروح ويرجع لى تانى يوم اكون جهزت له اوراق معينة وقلت له حاضر فجأة والله لقيته بيتكلم بصوت عالي بدون مقدمات وانا اكتر شئ بيستفزنى ان اى حد مهما كان مركزه يتكلم معى باسلوب غير لائق
كلمته باسلوب كويس لكن لقيته بيزيد فيها كنت باكلمه بصوت منخفض يقول مش سامعك ولما اتكلم بصوت اعلى يقول انت بتزعق لى
كنت باضحك والله مش عارف اتصرف معه ازاى
توقعت انه بيعمل كده علشان يشوف رد فعلى يكون ازاى
المهم راح اتصل بالدكتور صاحب المدارس واشتكى له والدكتور طبيعي اتصل عليا وسالنى
بس مش قال لى ايه اللى حصل ولا حتى زعق لكنه سالنى تقدر تعمل ميزانية قلت له ايه المشكلة عادي يعنى .. قال لى لا متعرفش وبعدين قال لى مزعل ا عصام ضحكك بجد وتوقعت انه معنا على الخط وبالفعل كان معنا على الخط المهم الدكتور قال لى شوفه عاوز ايه واعمله وبالفعل خلصت كل شئ .. وعصام جه عندى المكتب ورجع يضحك تانى
وجالى بعدها كم يوم وكان بيضحك ويتكلم كاننا اصدقاء من زمان وانا بطبيعتى مش باحب اكشر وباضحك
بعد كم يوم سالت عصام هو الدكتور سالك عنى وعن شغلى قال انا قلت له انك مية مية وهو مبسوط منك
هههههههههههههههههه
افتكرت نكتة المدير مبسوط منك قوى وبيقول لك مستغنيين عن خدماتك هههههههههه
بعد كم يوم قلت اشوف النبض عند الدكتور عامل ايه بالنسبة ليا
المفروض فى الصيف فيه دوام تانى بعد العصر .. طبعا قلت اطلب اضافى عن الوقت اللى هاقعده ده
رد الفعل كان ارجع لاتفقنا بالقاهرة لو مش عاجبك تقدر تسافر مصر واتفقنا بالقاهرة كان مغرى لاى حد ان الراتب كذا وتقدر تشتغل باى مكان تانى بالاضافة لشغل معنا وبدل سكن وكمان اولادك هيتعلموا بمدراس انترناشيونال على حساب المدرسة هو فيه كده ايه رايكم هههههههههههه
هو يعنى تهديد دي الارزاق بيد الله رحت باعت له فاكس ذكرته فيه بالاتفاق كذا وكذا وانى منتظر قرار خروجى نهائي من السعودية وعرفته انى مش الانسان اللى ممكن يتنازل عن مبادئه علشان اى فلوس
المهم المفاجأة كانت انه عمل تأشيرة الخروج النهائي بالفعل بناء على كلام الاخ عصام وكان عاملها اصلا قبل انا ما اطلب
اللى المفروض رجل مصري محترم هههههههههه محترم قوى
هو ده اللى بيحصل فى الغربة بين المصريين
ده بالاضافة للى بيحصل من بعض الاخوة الزملاء والتضارب فى الاقوال والافعال يبقي الواحد بيضحك فى وشك ومن وراك بيقول كلام ؟؟؟ اللى باقوله مش مجرد توقع ده حقيقة والله وعرفتها من المصدر الرئيسي لتلقي المعلومات افهموها لوحدكم
اللى مضايقنى بجد ليه كده ... ليه بنعمل فى انفسنا كده
امبارح جه عندى بالمكتب ولى امر عاوز يسحب ملف اولاده من المدرسة وينقلهم لمدرسة تانية ولما سالته عن السبب مرضيش يقول الا انه ذكر فى معنى كلامه ان المصريين بيعملوا فى بعض عمايل سودا
قلت له انت كمان .. بالرغم انه مهندس وكبير الا انه بيشتكى من الافعال دى
والله مش شكوى من المصريين فيه ناس كتير محترمة
حتى قلت للمهندس امبارح مش كل المصريين وحشيين بص لي واستغرب
قلت له يكفي ان حضرتك مصري وانا مصري
وده دليل على ان فيه ناس محترمة
طبعا بعد حوار معه كبير حسيت ان الراجل عاوز يرجع فى كلامه بخصوص الانسحاب بس قال ان شاء الله نكون على اتصال ببعض حتى لو مفيش نصيب يكون اولاده موجودين هنا وبعد ما كان مكشر وناقم على الوضع لقيته ابتسم

المواقف اللى حصلت لى كتير وكمان من ناس كانو اعز الاصدقاء
لكن للاسف الزمن ده على رأي ناس كتير اصبح ( زمن المصالح والفلوس وبس )

السؤال ؟
- انا مبدئي صح ولا غلط
- اعمل زي الاخريين وكل اللى يهمنى مصلحة نفسي وبس
طيب المكسب هيكون ايه فلوس .............. طظ طظ طظ .. اسف للفظ

على فكرة الحمد لله الان الوضع مستقر وتأشيرة الخروج النهائي اتكنسلت.. والحمد لله مازلت متمسك بمبادئي ومش هاتنازل عنها

يمكن احكى عن المواقف الاخري اللى حصلت لى بفترة عملى بمصر وبالسعودية يمكن اقدر اعرف رأي الاخرين يمكن انا غلط مش عيب انى اصحح من نفسي ومن افكارى

دلوقتى فيه حاجة كمان

الاخ الزميل اللى المفروض اجازة حاليا والمفروض يرجع يوم 6 /9 منتصف رمضان يعنى وانا كمان حجزت بالفعل على يوم 8 / 9 بعت لى رسالة بيقول انه مش هيقدر يجي علشان عنده ظروف قهرية بالرغم انى عارف مسبقا انه عامل حسابه اصلا انه يقضي العيد بمصر .. طبعا المدير مش هيوافق انزل الا لما هو يجي علشان يستلم منى الشغل

الحل ايه دلوقتى ؟ اطلب انزل نهائي .. ولا انتظر ولا ايه رأيكم

طولت ؟؟؟




26 التعليقات:

عاشقة الأحزان يقول...

حجز اول تعليق


وسع منك له

فووووووووووووووووووووووو

عاشقة الأحزان يقول...

وكمان تعلي


كل سنه وانت طيب ياجميل

عاشقة الأحزان يقول...

ايه ياعم مالك

بس فيك ايه بجد قلقتنى عليك

سبها على الله ومش تزعل ما ضاقت الا لما فرجت من عنده

ربنا يبعد عنك اى الم يارب

مودتى

القدر و انا يقول...

ذو الوجه المبتسم
شرفنى مرورك
يالنسبة للموقف الاول انت صح مليون فى المائة والارزاق بيدى الله والانسان اذا خسر نفسه لا تنفع مكاسب العالم
اما الموقف الثانى فلا مشكلة فيه
كل تاخيرة وفبها خير
صحيح عدم الالتزام بين الزملاء يحزن لكن للاسف بقى من النماذج دى كتير
تحياتى ودعواتى ان يوفقك الله

SaLLy يقول...

hi ezayek:
bel nesba lely sha3'al ma3ak elly 2al eno 3ayan dah 3ashan ye3ayed f masr el sa7 enak testa7mel o 3ady geda2 o tenzel masr ba3d ama yegy o 3'alat kol shewaya te2ol hat cancel el 2eqama belzat law 3ashan sabab mesh big deal
lel asaf fa3lan el masreyeen f masr zeft ana yama shoft mnhom l3'ayet ama be3edt 3anhom tamam o ya 3eny ba2a 3ala el aqbat lama tekon 3ayesh f usa bey7asesok en usa deh beta3ethom aslan o enhom kano metbahdelen f masr o mesh hayego hena kaman 3ashan el msolemen ye2rofohom,3aks kol el genseyat el tanya 2e7na ya3ny el mexican o el chines kol dol tela2ohom one family bas 2e7na lel asaf gowana shar 3ageb l ba3d
ya rab ya hady el nas o el 2olob nawar 2olobna,amien

ঔღঔ نـــوارة ঔღঔ يقول...

قلقتني عليك من تعليقك عندي

بس قلت اكيد حاجة بسيطة

مينفعش تكون مش مبتسم

الابتسامة هتظهر غصب من عنك اهوو :]

وبعدين مشاكل الشغل مش بتخلص وانت اتعوت عليها خلاص اهم حاجة انك مش بتتنازل عن مبادئك ودا الصح بعينه

الدنيا بقت وحشة اووي وكل واحد بيدور على مصالحه ويتنازل عن مبادئه لكن في الاخر مفيش حاجة هتنفعهم
الراجل الي بيعمل الفلوس مش الفلوس الي بتعمل راجل

الموقف الاول فظييع بجد دا انت حبيت الراجل مووت وبالاخر يطلع مقلللللب ربنا يسامحه ياسيدي

وبالنسبة للافندي الي خلف بموعده ونزل مصر وعاوز يتهنى على حسابك دا منه لله المفروض في اتفاق وميخالفوش

قهرتني جدا على السفر الي هيلتغي لكن مش هقوولك رايي خد قرارك لوحدك :]

ربنا يخفف عنك ويوفقك

منتظررررررين ابتسامة عريضة رغم كل شي

بالتوفيق يارب

norahaty يقول...

السلام عليكم ورحمة
الله تعالى وبركاته
اسفة استاذ ناجى
لكل ما حدث ويحدث معك
هناك !ما تقوله عانيت
انا منه حين اشتغالى هناك .
لىّ عودة للرد بعد الرجوع من
العمل بأذن الله .الكلام كتير
لكن الشىءاللى اقدر اقوله
أصبــــــــــــــــــر

ستيته حسب الله الحمش يقول...

ولاااااااااااااااااا تزعل نفسك سنتي واسمعني
انا شفت في السعودية مالا عين رأت من المصريين
واللي يهزر معاك ويبقى شكله لطيف ده مش هو اللي تأمنه
حسبي الله ونعم الوكيل
لو كان ها ياخد فلوسك افهم ليه يأذيك
لو كان ها يشتري حتى الدنيا "ومع انها متساويش" اقول اهو زيه زي الرقاصين اشترى حاجة
لكن لا ها يزيد في المرتب ولا ها يعلى في المنزلة وصدقني فوق كل ده لا ها يربح ولا يكسب


خليك زي ما انت بالضبط
ورزق واسع بعون ربنا في انتظارك
اصل الرزق يا ناجي مش فلوس بس

الرزق سعادة وراحة بال
الرزق صحة
الرزق ستر
الرزق عيال بعون ربنا زي الفل

حسن النية والأخلاق ربنا هو اللي بيمكر له
وسيء النية والأخلاق ربنا بيوريه المكر الأصلي من العدل الذي لا تأخذه سنة ولا نوم

اوعى اوعى تتغير
وها تشوف بعينك ولا تنسى ان دعوة المظلوم ليس بينها وبين الله حجاب

ومنهم لله اللي حوجونا نخرج من بلادنا ونشوف مرار الكفيل والفطير والخمير

صباحك فل

ستيته حسب الله الحمش يقول...

معلش انا رديت قبل ما اكمل البوست من القهر وحزني على زعلك

شوف كده كده برضه خليك زي ما انت لأن الراجل الضاكتور الى حد ما غدار ومش مأمون الجانب والراجل اللي يغير كلامه والراجل اللي يمشي ورا كلام سماعي والله اعلم بيبقى مش راجل قوي يعني

والأجازة لو اتأخرت شوية رأيي انك تصبر لإننا بنروح هناك ومعانا شوال صبر بحاله
ولحد ما تقدر تستحمل استحمل
دي اقدار الرجال والله يخليك ورينا الإبتسامة الجميلة دايما

ليس فقيرا من يحب يقول...

سلام عليكم

ياه دا الغربه وحشه بجد

قال وانا نفسى اسافر

حضرتك يا استاذ ناجى مش غلط

ولو قابلك فى حياتك ناس غير سويين

اوعى تغير قلبك النضيف ولا تغير

معاملتك للناس اللى قدامك لو وحش

فدى مشكلته لوحده وميجبركش

تعامله بالمثل وبعدين فعلا الفلوس

مش كل حاجه الستر والصحة وراحه

البال اهم بكتير من اى فلوس

وبعدين الراجل زميلك ده ربنا يهديه

وكل تأخيره وفيها خيرة

بص حضرتك انا مع ان الانسان يتغرب

علشان يحسن من حاله بس الغربه دى

تكون مؤقته يعنى لو كون نفسه بحيث

لما يرجع بلده يعيش حياه كريمه

تسعده يبقى بعد كده الغربه ملهاش اى معنى

يخرب بيت رغيى رغايه وهافضل كده

طول عمرى

ابقى صلى استخارة

ربنا يسعد قلبك وييسرلك امورك

ويكتبلك الخير حيث كان ويرضيك بيه

اللهم امين

تقبل تحياتى
فى حفظ الله

لنحيا فى اجواء الحب يقول...

انا هقولك حاجة

فى مبدا انا ماشى عليه

اعمل الخير وماتستناش من وراه حاجة

يؤ سفنى ان اقول لك ان احنا عايشين فى زمن المصالح

ونادرا لما هتلاقى ان فيه حد بيقدر اللى انت بتعمله عشانه

كفاية انك تبتغى وجه الله سبحانه وتعالى

ماتزعلشى نفسك بدل ماجيلك

منور دايما

مصرى دائما

أم مالك يقول...

طبعا لم استغرب لاى حاجة انت ذكرتها
لان عندى قصة طبق الاصل من قصتك
عملت انك تتغير انت نفسك مش حتقدر لان ديه طباعك فاثبت على ماانت عليه
خلى بالك من تصريحاتك او كلامك حتى
للى مش هم طرف فى المشكلة
فطبيعى الانسان فى هذه المواقف
بيفضفض فاحذر من هذا الامر حتى من اقرب المقربين
عاوزاك تتمسك بهدوءك لان صلحب المشكلة
اللى عندنا كان بيثور وده كان له دور كبير فى تصاعد المشكلة
الرزق بيد الله ده امر اكيد
طول مالظروف هادية وبتقدر تساويها
بذكاء وحكمة فخليك على مانت عليه
لكن اذا لمست الكرامة والاهانة والتطاول والمكايد فصفى معاهم ده
لو السكة وصلت لطريق مسدود
واتعامل انك طالما مفيش ظلم منك ليهم
ربنا حيكرمك من اوسع الابواب
وبعدين تحمل شوية ناجى فالتعاقد بتاعهم فعلا مميز فصاحب المشكلة اللى
بقولك عليها الراتب غير مجزى ممنوع باتا العمل لغير المؤسسة او اى عمل خاص
خمسة الاف ريال بدل السكن
فانا شايفة ان مميزاتهم كويسة
وبعدين خلى بالك انا عندى اخويا
مهندس فى الرياض شوف بلاوى اول ماراح
بس كان عنده صبر وحكمة دلوقت هو ليه
20سنة واخد وضعه جدا ومرتاح
فكرة النزول النهائى طالما لم تاتى منهم فلا تتعجل بها لان فى مصر حتشوف
عجب العجاب والعائد المادى قليل
واديك شايف ان المصريين هما اللى بيسببوا المكائد
دائما صلى استخرة والتزم بالدعاء
وانا معك اصل فيه امور لاينفع فيها غير الدعاء
وبالنسبة لنزولك الاجازة حاول
تتمسك بحقك فيها بكل الطرق يمكن يشوف
بديل غير اللى نزل ومش حيقدر يرجع
وبلاش تظهر لهم انك نازل الاجازة بس علشان تعبد مع زوجتك واولادك فهم يعتبروا ان هذه اسباب غير مهمة
شوف سبب قوى تقوله حتى لو اتصلت
على اللى فى اجازة يمكن يرجع من اجازته فى الميعاد
المهم الصبر والدعاء والتعامل بحكمة
وعدم التصريح بالاقوال لاى شخص
الشخص صاحب مشكلتنا طبعا الموضوع تتطور واشتاكهم فى السفارة واخذ
كل حقوقه منهم وربنا كرمه بعدها بفرصة جميلة حسب امكانياته اللى كان
بيبذلها بمقابل زهيد
حنتمسك وحنصبر لمزاياهم ولكن اذا الامر
مس الكرامة ولوى الذراع فلا
والبديل ليس الرجوع لمصر ولكن البحث
والتنقيب هناك على فرصة ثانية افضل
وربنا يكتب لك مافيه الخير
ودايما اطمن عليك وحاحاول اكلمك على الايميل اصل انا ايميلى على الجى ميل
حعمل واحد تانى على الياهو علشان
اتواصل معاك واطمن عليك
ربنا معاك ياناجى

sweet angel يقول...

السلام عليكم
-----------

كلام حضرتك فعلا صح وصح جدا

المصريين في الغربه 90% منهم بيبقو وحشين جدا مع بعض

شوف كام واحد ييقف مع التاني في الغربه وتلاقي التاني ده أخد مكان الاول في شغله

وكميه من المشاكل لا حصر لها

وطبعا طيبه القلب مش غباء
لان الانسان اذا كان بيتعامل مع مجموعه من غير الاسوياء
مش المفروض انه يتغير علشانهم

ربنا يوفقك ان شاء الله ويوقفلك اولاد الحل
وثق ان ربنا كاتبلك الخير

تحياتي

مي يقول...

ايه يا جميل مالك بس؟ احنا واخدين عليك بابتسامة ربنا يديمها عليك
بص معلش مش ذنبك انك بتعامل ربنا الاول فى معاملاتك مع الناس بس خليك حذر برضه الناس بقت وحشة اوىىىى
ومعلش لو الاجازة اتاخرت شوية
قدر الله وماشاء فعل
بس اصبر شوية واوزن الامور يعنى انت لو نزلت نهائيا متاكد ان الشغل مضمون وكده يعنى لو عايز لازم تحسبها قبل ماتنزل لان دلوقتى اصلا صعب المعيشة فى مصر
بس برضه انت ادرى بظروفك
ومعلش هى بس فترة وهتعدى متقلقش
انت انسان جميل اوى
كل سنة وانت طيب يا قمر

كيــــــــــــارا يقول...

اصبر لحد اما تسلم ولما تنزل القاهره فكر ورتب كل شي بس ممش تامن للدكتور دا تاني

هــــــــــــايدي يقول...

السلام عليكم ورحمه الله وبركاته
ذو الوجه المبتسم مكشر
طب ازاى
بجد زعلتنى اوى بالبوست دا
بص لو من جواك متاكد انك صح خلاص خليك زى ماانت
لانك لو غيرت مبداك علشان اى حاجه تانيه مش هتقدر تستمر وهتخسر نفسك
فعلا زممانا بئى بتاع مصالح وفلوس بس برده صدقنى فى ناس كويسه اكيد ممكن قليلين بس موجودين
عادى بئى ادينا عايشين
والى نزل دا ومش ناوى يجى حاول تكلمه تانى
بس بلاش حكايه النزول النهائى دى
بجد ظروف الشغل عدك احسن من مصر
وان شاء الله تنزل قريب
مش عاوزه اشوف التكشيره دى تانى
ممكن

yoyo يقول...

حسبى الله ونعمة الوكيل
ربنا يجازى اللى كان السبب فى اننا نخرج من بلادنا و تحوج لحد تانى بالشكل دا
اصعب شىء لما تلاقى اللى بيضرك بن بلدك يعنى اللى منك
مش عارفة الناس بقت بتفكر فى المادة وبس
لا اخلاق ولا دين ولا اى حاجة كدا
ملعون ابو الفلوس اللى بتغير النفوس بالشكل دا

انا بجد كنت حبيت الراجل لحبك واحترامك له
ربنا يسامحه يارب

معليش اصبر وان شاء الله خير
بس مش تأمن لحد تانى
وبالنسبة للاجازة ربنا يسامحه هو كمان
واصبر ان شاء الله ربنا يفرجها من عنده
واللى فيه الخير هيكون

كل سنة وانت طيب
رمضان كريم
ان شاء الله تكون ايام خير عليك
ربنا يسعدك و يسعد قلبك
ويارب دايما صاحب اجمل ابتسامة
تحياتى
يويو

سمسم يقول...

السلام عليكم
الدنيا اكيد فيها كتير
من كل الالوان والوشوش
بس الي انا اعرفو
لما انا اعمل خير بعملو لوجه الله
مش علشان فلان يستحق او لا
فلما حضرتو يغدر بي
صحيح انا حدايق
بس حرجع افتكر انو مش مهم المهم رضا ربنا
مش رضا الناس
تحياتي

assafo anaroze يقول...

عزيزي ذو الوجه المبتسم
اولا شكرا لزيارتك لمدونتي و انا سعيد جدا بها
ثانيا في مثل بيقول كن على طبيعتك تريح و تستريح
ان كنت فعلا متاكد انك صح اعمل اللي انت متاكد منه و لا يهمك الناس الثانية لانه في النهاية لا يصح الا الصحيح و البقاء للاصلح يا سيدي
مهما عملوا فان ربنا عارف نوايا كل واحد و بيجازيه على قد عمله
سيدي سعيد بالتواصل معك و اتمنى دوامه
مودتي

ذو الوجه المبتسم يقول...

السلام عليكم

اخوتى واصدقائي الاعزاء جدا

عاشقة الأحزان
متقلقيش .. كل سنة وانتى طيبة
------------
القدر و انا
نورتى المدونة بقالك فترة مش بتيجي هانتظرك كتير تانى
-----------------
SaLLy
نورتينى بجد وان شاء الله تكررى الزيارة
------------------
ঔღঔ نـــوارة ঔღঔ
الابتسامة لازم تظهر غصب عنى بجد
-----------------
norahaty
نورتينى يا دكتورة خلينا نشوفك كتير
----------------
ستيته حسب الله الحمش
تعليقك خلانى افك شوية ومش زعلان بجد
------------------
ليس فقيرا من يحب
نورتينى بتعليقك واشكرك على كلامك ومجاملتك الرقيقة
------------------
لنحيا فى اجواء الحب
نورتنى وفى انتظارك يا عم بس انت تعالى هههه
---------------
أم مالك
نورتينى وكلامك كله مسموع وينفذ

----------------------
sweet angel
نورتينى... عارفة انا عن نفسي باعتبر المصريين الكويسيين كم بالمية مية بالمية كويسيين يمكن هى دى طبيعتى بجد
---------------------
مي
تورتينى .. انتى الاجمل ومتقلقيش اخوكى جامد وصابر
صابر الرباعي هههههههههه
-------------------------
كيــــــــــــارا
نوتينى صابر اهو
----------------------
هــــــــــــايدي
نورتينى يا دكتورة
اكيد كل واحد فينا بيعتبر نفسه صح 100%
-------------------
yoyo
حسبي الله ونعم الوكيل اعتقد انها تكفي .. حسيت بجد انك زعلانة قوى من البلد واللى خرجونا منها متقلقيش هنرجع يعنى هنرجع غصب عنهم
--------------------
سمسم
المهم فعلا رضا ربنا
------------
assafo anaroze
نورت المدونة بزيارتك الاولى وان شاء الله مش الاخيرة ودوام التواصل باذن الله
وشكرا على تعليقك الجميل

---------
اشكركم بجد من قلبى على اهتمامك
واطمئننكم عليا

انا الحمد لله بخير

يوم ما كتبت البوست بجد كنت متضايق وبخاصة من رسالة الزميل الاخ ابراهيم اللى المفروض انا رئيسه المباشر لانه خلف اتفاقى معه ووعده لى انه مش هيتاخر بالرغم انى عرفت من جهات اخرى انه مقرر قبل نزوله انه مش هيرجع الا بعد العيد وبالرغم من كده
مكنتش مصدق لانه راجل طيب ومحترم
لكن لما وصلتنى رسالته وقال انه هيتاخر زعلت بجد لانى مش باحب حد يخدعنى ولو كان قال لي من البداية انه هيرجع بعد العيد مكنتش اتضايقت على الاقل مكنتش هاحجز تذاكر
----------
المهم انا حكيت موضوع المحاسب القانونى كنوع من الفضفضة بجد مع ان فيه مواقف اصعب منه واجهتنى قبل كده

اخوتى الاعزاء
لما باكتب مش لمجرد الفضفضة ولكن علشان بجد استفيد من ارائكم وباعتبرها تأييد لقرار وتأكيد على موقفى

واختى الكبيرة ام مالك
انا فاهم كلامى ونصيحتك ليا جدا
علشان كده طلبت نصيحتك

باطمنك عليا انا الحمد لله قعدت مع المدير واتفقت معه انى هانزل بموعد حجزى الطبيعي والاخ الزميل يجي برحته بعد العيد
----------------
كل سنة وانتم طيبين يا طيبين
وان شاء الله لو فيه نصيب نتقابل على الطبيعة بعد العيد هاكون مبسوط جدا

بس الست ستيتة الحمش اللى بتنظم اللقاءات تعمل حسابى فى كرسي على جنب كده
ونوارة بافكرها ال مكشر ال
تفتكري انى مكشر هههههههههه

باكرر شكرى وتقدير واحترامي لكل الاخوة اللى بجد باحبهم واللى انبسطت كتير بتعليقتهم وتوجيهتهم

ماما يقول...

اخى العزيز الوجه المبتسم..استاذ ناجى
انا لن اضيف شيئا جديدا فوق ماقالوه الاخوه والاخوات
لكن ليا كلمه من قلبى بقولك:
يقول الله عز وجل(( ويمكرون ويمكر الله وهو خير الماكرين))
استعن بالله وارمى حمولك على الله
انت اولى باى قرش تجيبه لعيالك بالحلال وانت مبابتخدش حاجه من جيب حد
تمسك بمكانك لاخر لحظه كتبهالك ربنا عندهم

وبالنسبه للعيد
ياسيدى عديها
بس خد بالك عامله بالمثل
هو خد العيد ده كله لنفسه
انت تاخد العيد الكبير كله لنفسك ان شاء الله
ولاتتنازل عن حق ولادك فى رؤيتك بجوارهم وبجوار اهلك
وكل سنه وانت طيب

شمس النهار يقول...

ازيك
للأسف كلامك ده انا سمعته من مصريين بيعملوابره مصر
سمعته اكتر من مره
وانهم وحشين في بعض
انت اللي المفروض انك تسأل المحاسب ده انت ليه عملت كده
ممكن يكون خايف انهم يستغنوا عنه ويخلوك انت
مع ان الرزق بيد ربنا
والا يفر احدكم من رزقه حتي يدركه كما يدركه الموت
ربنا معاك

ذو الوجه المبتسم يقول...

ماما
نورتى المدونة

واتمنى دوام الزيارة الغالية

انا الحمد لله بعد ما شفت ردود الاخوة بالرغم انى بجد كنت متعصب لما وصلتنى رسالته لكن فكرت بعقل وبهدوء واتكلمت مع المدير السعودي وبالفعل تمت الموافقة انى انزل اجازة بالموعد اللى انا حجزت فيه

وان شاء الله اقضي العيد مع الاهل بمصر

ذكرى لموقف المحاسب القانونى كنت متردد احكى عنه لانه انتهى وربنا كتب لى انى استمر الحمد لله

تحياتى لك

ذو الوجه المبتسم يقول...

اختى شمس النهار
حمدلله على السلامة

نورتى المكان
كنت باشوف تعليقاتك عند الاخوة وكنت بادخل مدونتك . وقلت لنفسي هى الست دي زعلانة منى ولا ايه .. مش عارف

المهم ياترى رجعتى مصر ولا لسة
طمنينا عليكي

اختى العزيزة انا مش من طبعى اسال الشخص اللى بياذينى انت ليه عملت كده مش خوف منه ولا شئ لكن لانه بجد بينزل من نظرى الى ادنى مستوى

عندما كنت اشتغلت بمصر حصل اختلاف مع احد المديرين بالعمل ولم اذكر اى شئ لصاحب العمل الا بعد ان فاض الكيل من هذا الشخص
تعرفي القرار كان ايه
قال له اللى الاستاذ ناجي يقوله تنفذه ولو مش عاجبك اتفضل امشي

انا مش عاوز اعمل كده مع اى شخص والارزاق بيد الله

لكن والله ومش باكذب عليكي
اللى باشوفه سواء عنى او عن غيري من بعض المصريين شئ مؤسف ومحزن واخرها اليوم المدير السعودى بيقول لى ليه المصريين بيعملو فى بعض كده
مش علشان موقف زميلي بس
علشان مواقف العمل كمان
انا من النوع اللى مش باحب اتكلم عن حد ولو اتكلمت يكون بالخير الحمد لله او السكوت بيكون افضل
ربنا يوفقك الجميع

تقبلى تحياتى اختى شمس

norahaty يقول...

مصر منورة باهلها
الموجودين فيهــــــا
واللى راجعين لهـــــــا

norahaty يقول...

تنور مصر بأذن الله
وتقضى وقت سعيد مع
اسرتك وأولادك إن شاء
الله وزى ما قلت لك انت
رايح لهدف معين حطه امام
عينيك حققه وارجع لبلدك
ولاهلك ولناسك كمـــــــــان