السبت، 24 أبريل، 2010

عايز حقي من بلدي

عايز حقي

الحكاية مش حكاية فلوس
الفلوس كتير وخير ربنا كتير
الحكاية اكبر من كده

=====
عبدالستار ده راجل فلاح بسيط
وبيته من بتوع زمان اللى لو زقيته بايدك هيقع ،
مراتة الست ام حسن
ست طيبة قوى وبطبيعتها قوى
عبدالستار عنده من الاولاد اربعة ومن البنات اربعة
والعيال كبرو وعاوزين يتجوزووووا
اتنين منهم مسافرين بيشتغلوا فى الخليج وطالع روح اهلهم فى الغربة
والكفيل مطلع عينهم وعين ابوهم وبرده الراتب على القد ،
طيب مسافرين ومتغربين ليه ، علشان يساعدوا ابوهم الراجل الطيب عبدالستار
علشان يستر بناته ويجوزهم ويفرح بهم ،
طيب والعيال دى هيتجوزوا امتى ،
الحكاية طويلة قوى ،
عبدالستار والست بتعته وهما في بيتهم وفى غرفتهم قاعدين على الارض
الاخ عبدالستار بيبص فى الارض كده لقي حاجة غريبة قوى
ايه ده يا عبدالستار
والله يا ام حسن مش عارف
الراجل والست خافوا
طب ايه اللى حصل
اللى حصل ان الارض اتحركت
ازاى اتحركت
هبطت شوية وظهرت كانها حفرة
عبدالستار جاب الفاس بتعته وقال اوضب المكان واسويه
ولما ربنا يفرجها ابلطه ببلاط مزايكووووا
الراجل مسك الفاس واول خبطة فى الارض
لقي الارض بتنزل لتحت اكتر
الراجل خاف
وام حسن نادت العيال يساعدوا ابوهم
عبدالستار استنى بس يا ام حسن
خبط تانى
الارض اتشقت وظهر شئ غريب
سلم تحت الارض
فحت اكتر ، لحد ما ظهر المستخبي
ايه ده
ده كنز
دهب
ياقوت
مرجان
احمدك يارب
زغرطى يا ام حسن
فووريجت
وهنرجع عيالنا بلدنا
وهنجوزهم
ونفرح بيهم وهما معنا
طيب عبدالستار ده راجل فلاح
ميعرفش هيعمل ايه ولا هيتصرف ازاى
عبدالستار له اخ اسمه جابر
متعلم شوية
عبدالستار راح لاخوه جابر
وحكى له بالتفصيل
جابر قال لعبدالستار متقلش لحد
وانا هاتصرف
الست مرات جابر سمعت كلامهم
بعد ما عبدالستار مشي
ندهت جابر جوزها
وقالت له لازم يكون لنا نصيب فى الكنز ده
وعلى قد ما تقدر تاخد خد
جابر كان يعرف واحد موظف كبير
وراجل فاهم ويقدر يتصرف
راح له وحكاله على الموضوع واتفق معه على مبلغ
بعد كم يوم جه جابر لاخوه عبدالستار
وقال له بكرة هنروح نقابل الراجل اللى هيشترى الكنز
فعلا تانى يوم عبدالستار لبس الحتة اللى على الحبل واتشيك على سنجة عشرة
جلابية لكن ايه موديل 2010 وعمة وشملة جديدة
وجابر كمان اتشيك
وراحوا لصاحب جابر اللى اخذهم للراجل اللى هيشترى الكنز
ولما وصلوا للمشترى
كانت مفاجأة من العيار التقيل
عبدالستار قال لجابر
جابر مش هو ده اللى بيطلع فى التليفزيون
وبيتكلم عن خدمة البلد وعن اللى المفروض نعمله علشان بلدنا
جابر: اسكت يا عبده
متتكلمش
انت عارف احنا في دلوقتى
ده اكبر راس بالبلد
عبدالستار
ومين اللى معه ده يا جابر
جابر انت مالك يا عبده
قلت لك اسكت
خلينا نبيع ونقبض ونخلص
عبدالستار بصصص للراجل الاجنبي
انا شفتك فين
شفتك فين
عبدالستار افتكر
ده اللى بيقول هناخد القدس غصب عن اى حد
دى بتعتنا من زمان
اه
هو ده
انا شفته بالدش مرة
عبدالستار دلوقتى محتار هيعمل ايه
يبيع
ميبعش
طيب لمين هيبيع
وليه هيبيع
وليه الراس الكبير بتبيع
هو محتاج
عبدالستار عقله هيشت
بالله عليكم
قولوا لعبدالستار ايه الحل ؟؟؟؟

2 التعليقات:

مهموهـــــــة يقول...

بحب اسم عبد الستار اوي اوي اوي و لانه اسم شخص عزيز عليا اوي

اختيار جميل

بس القصة وجعت قلبي و الله

انا بقوله ما تبيعش يا عبد الستار
هو لازم ياكل من حلال علشان ربنا يكرمه
هو يروح مكان موثوق فيه
هيئة الاثار مثلا و يوريهم المكان و اكيد هيكون ليه نسبة من الموضوع ده و ساعتها تبقى حلال

و بجد ربنا معاه و لازم ياخد باله من اخوه و مراته لانهم بجد عقارب
لان ساعة ما يخونك قرايب يبقوا عقارب

خالص تحياتي و تقديري

شذا الروح يقول...

ايه الناس الخاينه دى
ربنا يكفينا شرهم
وربنا يبعدهم عنك ياعبد الستار

قصه وجعتنى جامد

متشكره لحضرتك

ويبقا التواصل
وهضيف المدونه عندى للمتابعه
تقبل مرورى
شذا الروح