الخميس، 23 يوليو 2009

من الحياة .. حسام

حسام
عمره دلوقتى 28 سنة وحتى الان لم يستطيع ان يتخذ ولو قرار واحد خاص بحياته بالعكس دائما يهرب من حياته ومن المحيطين به .. طيب ليه
التربية واسلوب المعيشة ؟؟
طيب الاب والام هيعملو ايه ؟ ناس على قد حالهم
عملوا اللى عليهم معه ومع اخوته
علموا الاولاد كويس وجاهدوا بالحياة علشان اولادهم يرتاحوا
الوالدين : طيب ليه يا حسام .. ليه بتدخن .. ليه بتشرب .. ليه انت مش ملتزم
حسام : انا اعمل ايه يعنى .. اشمعنى فلان وفلان وابن فلان
كل واحد منهم عنده عربية وشقة محترمة واهله مريحينه
انا ليه مكنش زيهم
انا اقل منهم في ايه
الوالدين طيب اشتغل واجتهد وانت تركب العربية اخر موديل وتسكن بافخم شقة
حسام : وليه اهلى معملوش ليا زي اهلهم ما عملوا
اشمعنى انا اللى اتعب واشقة ويطلع روحى
الوالدين : اخواتك كلهم زيك وانت شايف الوضع بايدنا ايه نعمله لك ومش بنعمله
حسام : معرفش
** مرت ايام كتير والوالدين عاوزين يشوفوا حل لحسام علشان يريحوه
الوالدين : ايه رايك نخطب لك يا حسام
حسام : ماشي
الوالدين وحسام راحو شافو العروسة واتفقوا على موعد قراءة الفاتحة و الخطوبة
تم الاتفاق والعروسة ملتزمة وبنت ناس طيبين وحافظة القرآن
قبل الخطوبة بيوم حسام خرج مع اصحابة يحضروا فرح واحد صاحبهم
ابن عم العروسة شافه قاعد بيشرب سجاير وبانجو ياااااااااه
طبعا الطبيعى انه يقول لعمه ابوا العروسة وبالفعل كان
ابوا العروسة لانه ملتزم دينيا اتصل بالوالدين وقال كل شئ قسمة ونصيب
حسام : اتعهد انى اكون انسان كويس ودى هتكون اخر غلطة ليا وان شاء الله هالتزم
مرت ايام والوالدين عاوزين يزوجوا حسام علشان يطمنوا عليه
راحوا لعروسة تانية وتالتة وكل عروسة تتفشكل بحجة شكل
حاليا حسام كتب كتابه وهيتجوز بعد فترة بسيطة
حتى الان حسام مش عارف يتخد قرار مش عارف ينظم حياته مش عارف يوفر من راتبه شئ ؟!!!!!
السؤال دلوقتى ؟؟؟!!!
** ياترى حسام هيقدر يحافظ على زوجته ؟؟
** ياترى حسام هيقدر يراعى بيته واسرته بعد الزواج ؟
** ياترى الاهل هيكون لسة عليهم دور يأدوه تجاه حسام ؟
** ياترى ايه التوصيه اللى نقدر نقدما لحسام واهله ؟



25 التعليقات:

غير معرف يقول...

وضع حسااااام صعب جدا وصعب انه يتغير

وبرايي شاب زي هيك مش هيقدر يصون زوجته ولا حتى قادر على فتح بيت

باعتقد التربية من الاساس فيها شي غلط المفروض علموه المباديء والاخلاق وانه يرضى بالي ربنا قسمه ليهم

بجد ربنا يصبر اهله عليه ويهديه يارب

ميررسي عالقصص الي من الحياة

تحياتي

♥نبع الغرام♥♪≈ يقول...

احجز مقعد


وارجع تانى

ههههههههههههههههه

♥نبع الغرام♥♪≈ يقول...

هو حضرتك شغال مصلح اجتماعى ولا دكتور نفسانى

هههههههههههههههههه
يا خوفى يابدران

ههههههههههههههههههه

♥نبع الغرام♥♪≈ يقول...

بس تعرف بجد وضع الانسان ده اللى اسمه حسام غلط فى غلط

انا عن نفسى لا ائتمنه على اى شىء

يحاول يصلح من نفسه لانه اتربى غلط

وكمان للاسف م شاب على شىء شاب عليه


تحياتى لحضرتك

بنجاواتى يقول...

السلام عليكم

هجاوب ع الاسئلة على طول

انا شايف ان حسام اذا استمر على حاله ده يبقى مش هيقدر يبنى بيت ويستمر هذا البيت لانه ببساطة اللى مش قادر يسيطر على نفسه ويتحمل مسئولياتها اكيد مش هيقدر يتحمل مسئولية اسرة

وكمان الانسان مما لا شك فيه من غير رضا بما قسمه الله له يبقى مش سعيد
قال تعالى :
وَكَذَلِكَ فَتَنَّا بَعْضَهُمْ بِبَعْضٍ لِيَقُولُوا أَهَؤُلاءِ مَنَّ اللَّهُ عَلَيْهِمْ مِنْ بَيْنِنَا أَلَيْسَ اللَّهُ بِأَعْلَمَ بِالشَّاكِرِينَ

ودور الاسرة اعتقد انه انتهى عند هذه المرحلة ولكن يبقى السؤال هل تم دور الاسرة كما يجب ام كان هناك تقصير فى تربية حسام كى يصل الى هذا الانسان الذى تحكى عنه

تحياتى

حنين القلب يقول...

اولا حسام انسان ضعيف واظن ان الزمن اللى احنا فيه مش فيه مكان للانسان الضعيف المفروض اهله كده عملوا اللى عليهم ربوه وكبروه وعلموه يبقى يعتد على نفسه

اكبر مشكله بتقابل الانسان سواء راجل او بنت انه يكون مش بيعرف يتحمل المسئوليه مش بيعرف يعتمد على نفسه
دى مصيبه
وخصوصا لو راجل لازم يتعلم يتخذ قراره بنفسه ويتحمل مسئوليه قراره سواء صح او غلط
واما ولا هيعرف يتجوز ولا يفتح بيت وحتى لو اتجوز هيفشل لان الجواز مسئوليه
وهيفضل طول عمره عايش لنفسه وللساجير والبانجو وبس وعمره ما هيبطل لانه بقى طبع والطبع يغلب التطبع
لازم يتغير من جواه
ويقرب من ربنا اكتر
وربنا يوفقه الى ما يحب ويرضى

Atef Shahin يقول...

إذا كانت التوبة نصوحة فليوفقه الله ولكن على أهل الفتاة أخذ الوقت الكافي للتأكد من ذلك

ليس فقيرا من يحب يقول...

السلام عليكم

والله يا سيدى الفاضل من الواضح
ان الواد حسام ده واد نايتى
وللاسف العيال النايتى دول ومن واقع
نماذج كتيره فى حياتنا ميعتمدش عليه
هيرمى كل المسؤليه على زوجته المسكينه
ويهرب هو فى الطراوة وطبعا الاهل عمر
دورهم ما ينتهى بالطريقه دى لانهم هيقعدوا طول الوقت يحاولوا يصلحوا غلطاته ويرمموا حياته
مفيش حل قدام حسام غير انه يجمد ويحاول يفوق قبل فوات الاوان ويتوب لربنا
ويحاول يتحمل المسئوليه
بس الكلام سهل اللى اتبنى فى 28 سنه عمره ما يتغير بسهوله

معلش طولت علىك
تحياتى لحضرتك

marwa يقول...

السلام عليكم ورحمة الله وبركاته
انا هوجه كلامي لحسام مباشرة
حسام.. في شباب زيك كتير بل أسوأ منك لأنهم مش عارفين عيوبهم انما انت عارف معظم عيوبك وعامل والدك ووالدتك حجة تستخبها وراها مع ان الحلول موجوده يعني مثلا
1:صلي بانتظام في المسجد هتقرب من ربنا اكتر وتتعرف على أصدقاء ملتزمين
2: في كتب جميلة مليانة بنصائح شباب ربنا هداهم واصبحوا الآن قدوة
3: اقراكتب كتير وخصوصا الاسلامية زي سيرة الرسول(ص)والغزوات والفتوحات
4:لازم ترفع راسك لفوق لأنك انسان عنده نعم كتير غيره بيتمناها
5:بص للمستقبل وما تبكيش ع اللي فات
وياريت وانت بتقرأ القرآن تاخد بالك من الأية دي :((ان الله لا يغير ما بقوم حتى يغيروا ما بأنفسهم))
والتغيير مش بالكلام ده بالفعل
لازم تتغير والا .. ما تظلمش بنات الناس معاك
والسلام عليكم

شمس النهار يقول...

ازيك
عارف حسام ده عاوز معجزه من ربنا
لانملك له الا الدعاء ان ربنا يهديه
بالورقه والقلم وبتفكرنا الانساني هو لاهيعرف يبقا كويس والا يراعي اسره
والا يحافظ علي حد
كان عرف يحافظ علي نفسه الاول
بس لو ربنا اراد له الهدايه مش هتلاقي احسن منه
ربنا يهديه ويعفوا عنه

وردة يقول...

المشكلة صعبة جدااا
حسام ده مشكله بجد
هو المفروض اهله يشيل ايدهم من مسئوليته من زمان اوووي من ايام ما اتخرج
لازم هو يعتمد علي نفسه علشان يعرف قيمه بيته وزوجته واولاده
طب لاقدر الله زعل مع زوجته او حد من لاده عنده مشكله حيجري علي اهله ويقلهم اتصرفو
هو مش انسان متواكل مش بيحب يتعب
مش عاوز يعرف طعم التعب وعلشان كده عمره ما حيعرف طعم الراحة
بجد لازم يقف مع نفسه
ربنا يوفقه
سلام

غير معرف يقول...

اولا شكرا لمرورك عندى وانك طمنينى عليك وبالنسبة لزوج ابنتى فالحمد لله المشكلة اتحلت بس باذن الله يتواصل معك عبر الايميل
بالنسبة لحسام فزعنى موضوع البانجو ده
ممكن يتغير بس لو بعد عن صحبة السوء
فالصاحب ساحب ربنا يهدى شباب المسلمين
تحياتى

سمسم/سما يقول...

السلام عليكم
ربنا يكرمك
الوضع اكيد مو منيح بس اكيد في حل دايما يعني مش مفقود الامل منو
يحتاج بالفعل للصحبة الطيبة اعتقد انها اكتر شي ممكن ياثر عليه بالايجاب
والوالدين دورهم كبير هم غلطوا بالاول بس لازم يصححوا خطاهم

rovy يقول...

السؤال صعب جداا .. لأن حسام وحده هو اللى يقدر يقرر اذا كان عاوز ينجح و لا لا .. عاوز فعلا يتغير ؟ و كمان زوجته ان شاء الله لازم تعرف ان فى ايديها حاجات كثير ممكن تعملها و لازم تفهم انها داخله على مرحله صعبه لازم اهل حسام يكلموها بصراحة و يفهموها انها لو بتحبه فعلا حتقدر تساعده علشان يكون انسان تانى .. المسؤليه مشتركه دلوقت بين حسام و ارادته هو شخصيا و بين زوجته اللى لازم تعرف و تقرر اذا كانت تقدر تقف جنبه و لا لا .. لأنها لو صدمت فى اخلاقه اكيد مش حتقدر تستمر معاه لكن لو من الاول اخذت الموضوع بتحدى و صممت انها تساعده و تغيره ان شاء الله فيه امل كبير انها تقدر تساعده ..
ربنا يهديه يارب و يعينه و يهدى كل الشباب الى ما يحب و يرضى ..

خالص تحياتى

Kiara يقول...

حسام لسه ميعرفش يعني ايه مسئولية وبالتالي لو معاه مال قارون ميقدرش يتجوز

واهله مينفعش يكونوا معاه بعد الجواز افرض لقدر الله ماتو هيحصل ايه بعد وفاتهم

لازم الاول يسيبه من الشرب ويقرب من ربنا ويشتغل شغلتين يقضي يومه شغل لحد اما يعرف قيمة العمل والمسئولية بعدها ممكن يكون مسئول عن زوجه واطفال غير كدا لا

عاشقه الرومانسيه يقول...

سبحان مقلب القلوب
مين عارف
مش ممكن ربنا يهديه؟
بس المهم انه يحب لنفسه الهدايه الاول
ويطلبها من ربنا
ويبعد ان اصدقاء السوء

MaNoOoSh يقول...

اعتقد ان دور الاهل فى السن ده خلاص انتهى
وحتى التوجيه مش هيبقى ليه نتيجة فعالة

بالنسبة لحسام
فهو حاليا غير قادر انه يفتح بيت ويكون مسئول عنه
مش علشان الماديات.. ابدا
علشان هو اصلا مش فى عقله.. بيفكر فى ايه اللى ناقصه بدل ما يدبر حياته باللى معاه ويسعي يحسن معيشته

ولو البنت اللى كتب كتابه عليها مكنش ليها تأثير فى انها تخليه يبطل يشرب حاجات وحشة.. يبقى هتتبهدل معاه وهتشوف ايام تعيسة جدااااااااا

حسام عمره ما هيتغير غير لو هو اللى من جواه قرر يتغير ولقى حاجة بيحبها فى الدنيا تشده للتغيير للأحسن
والدور الاكبر الوقتى على زوجته اللي ربنا يكون فى عونها

صدى الصمت - عاشقة الورد - يقول...

هوة إنت فتحت باب لحل المشاكل الأسرية هنا ولة إيه ؟؟

خلاص خلاص ماتزعلش أنا بأهزر
هههههههه
مشكلة حسام هيه مشكلة أغلب الشباب دلوقت وبتتحل حسب شخصية الناس ال بتتعامل معاه يعنى ممكن زوجتة وأهلة يقدروا بشوية صبر يغيروا فيه شوية من السلبيات
أو يحصلة مشكلة أو يمر بأزمة تعمل نقلة وتحول فى حياتة
------
بالنسبة لنسخة الكتاب
أنا ماعنديش أى خبرة فى إرسال أى حاجة بالبريد لكن هاأسأل وهأحاول أعرف
تحياتى

مي يقول...

اهنيك اولا على الموضوع
للاسف كتير اوى من الشباب عايش كده مستنى الحاجة الجاهزة سلبى فى اراءه
حسام لايؤتمن على حاجة لانه مش مؤتمن على نفسه اصلا
والتربيه اساسا غلط فين تحمل المسؤلية فين التربية الدينية الصحيحة
لو اتمسكنا بده كانت كل حاجة هتمشى
صح
اعتقد ان الايام هى اللى هتعلمه
ربنا يستر عليه


تحياتى ليك

طوبه فضه وطوبه دهب يقول...

MA BONYA 3LA BATL FHOA BATL elzy dah 3mro ma yadr yft7 bat wla y7s bmsolya maho kol 7alat el tlak fmogtm3na sbabha amsal haza el ansan ely msh naf3 fay shaa

اقصوصه يقول...

عن نفسي ما اعتقد ان الزواج هو الحل

الحل ان هو يحل مشاكله قبل

ويكون قادر على تحمل المسؤليه

وبعدين يقدم على خطوه مثل هاي!

akeed يقول...

المشكلة عند حسام ان الاهل من الأساس لم يعلموه ان يعتمد على نفسه و ان لا يتواكل على الناس ممكن زوجتة تساعدة على ان يغير من شخصيته ان كانت صالحة و لو كانت هوائية سوف ينقلب حاله الى جحيم و الاخرى ان يتغير هو من تلقاء نفسه نظراً لمروره بمواقف عصيبة و ايضاً الاهل يحاولون ان ينصحوه .


تحياتى وتقديرى على هذا البوست الرائع

هــــــــــــايدي يقول...

السلام عليكم ورحمه الله وبركاته
ازيك عامل ايه
عارف فى اعلان اسمه استرجل واشرب بيرل
بيتهيلئى حسام محتاج يشوف الاعلان دا عاوزينه سترجل بس من غير بريل
سبحان الله ربنا قسم الارزاق كل حد وله حاجه
فى حد غنى وحد مبسوط وحد بصحه كويسه وحدد معاه اللى بيحبه
كل واحد له ميزه عن التانى حسام بس عاوز يشوف نعم ربنا عليه
ومش ننكر برده ان التربيه من البدايه كان فيها حاجه غلط اكيد الاهل مش علموه انه يكون قنوع وانه مش يبص لغيره
لو مش بئى راجل وقدر ياخد قرار دلوقت هياخده امتى؟؟

جــــوه القـــلـب يقول...

انا متهيئلى انه انسان صعب الاعتماد عليه لانه مش واخد اى قرار فى حياته ومش عارف هو عايز ايه وانه عايز الحاجه السهله من غير مايتعب
هو لو اتجوز ربنا يسطور على مراته واولاده وممكن يكون ده بدايه انه ينصلح حاله ويكون انسان كويس ....
ياريت يحاول يصلح من نفسه لانه مش هيكون لوحده هيكون مسؤل منه اسرة كامله ولازم يكون اد الوضع الجديد...
rock....

ذو الوجه المبتسم يقول...

اخوتى واصدقائي الاعزاء
انا متابع طبعا تعليقتكم كلها
وتقريبا كل التعليقات متفقة مع رايي الشخصي
لكن عاوز اسيب الموضوع للايام علشان تقول رايها
المفروض الجواز يكون يوم الخميس القادم
اليوم مات واحد من عائلته
ياترى الفرح هيتاجل ولا هيتعمل بدون صوت لسة مش عارف

باتمنى ان ربنا يوفقه ويهديه

هارجع لكم تانى