الأحد، 30 أغسطس 2009

محمود عبدالعزيز .. صديقي

منذ اكثر من 12 سنة كنت اجلس منفردا بنفسي فى البيت بغرفة خارجية لبيتنا
كان الوقت تقريبا بعد العصر وما اجمل هذا الوقت فى الريف عندما تظلل الاشجار بظلها
على البيوت وعلى الشوارع سمعت من ينادي باسمى
استاذ ناجي .. خرجت لارى من المنادي فوجدت شابين
احداهما الاستاذ محمد السعيد وهو شاعر وكاتب والاخر لم اكن اراه من قبل
وهو محمود عبدالعزيز ،
اتفضلوا اهلا وسهلا بكم
دخلنا الغرفة وبدأنا التعارف
الاول انا حمادة السعيد من غيتة " البلد اللى جنبنا "
الثاني انا محمود عبدالعزيز من غيتة وصديق حمادة
انا : اهلا وسهلا بكم
حمادة : انت طبعا متعرفناش
انا : بصراحة انا سمعت عنك يا حمادة مش انت صاحب ديوان شعر كذا ...
ونزلته قريب باسم محمد السعيد
حمادة : ايوه .. انت قريته
انا: بصراحة لا.. بس سمعت عنك من صديق وكان نفسي اتعرف عليك
حمادة : ده شرف ليا طبعا ، محمود عبدالعزيز من اعز اصدقائي وهو كاتب ومؤلف
وبصراحة سمع عنك بخصوص الرسم ف جيت انا وهو علشان يكون بيننا تعاون مشترك
انا: تحت امركم
محمود : انا باجهز ديوان جديد لاول مرة وعاوز حضرتك ترسم رسوماته
انا : من عينيا
بدأ محمود يعرفنى بنفسه وهو من عائلة مين فى البلد ...
واكتشفت انه يقرب لي من بعيد ، يعنى قرابة من ناحية الوالدة
شربنا الشاي واتكلمنا كتير واتعرفنا على بعض اكتر
انا وحمادة و محمود والوقت جري بسرعة
حمادة : طيب احنا هنستأذن وياريت نشوفك عندنا قريب تشرفنا طبعا
انا: حاضر .. بصراحة انا مبسوط جدا بالتعرف عليكم
بدأنا بالفعل تبادل الزيارات وبعد فترة اتعرفت على مجموعة اكبر
من الاصدقاء الفنانيين والكتاب والشعراء والمفكرين من بلدهم ، بصراحة شباب زي العسل

** اما عن محمود فهو انسان مميز وسط هذا العدد من الاصدقاء كتاباته
وافكاره كان فيها ابداع رهيب واسلوبه وحواراته كانت متميزة جدا
بهدوء الاعصاب والابتسامة اللى مش بتفارق وجهه ابداً
حسيت ان علاقتى بمحمود اصبحت اقوى
رغم ان تعارفنا من فترة بسيطة جدا وهو ايضا كان دايما ما يتحدث عنى لاهله ولاصدقائه
محمود كان وقتها بكلية الاداب - قسم اعلام - السنة النهائية
وكان بيجهز اوراق الديون اللى المفروض اخده منه اعمل له الرسومات
علشان نبدأ طباعته وتوزيعه
قبل امتحانات الجامعة محمود فكر يعمل عملية القلب لانه كان مريض بالقلب منذ صغره
وقرر يعمل العملية قبل ما ينتهى من الجامعة علشان المصاريف ،
والهدف ان الجامعة هتساهم فى جزء من تكاليف العملية
لما عرفت بموضوع العملية رحت له البيت وقعدت معه
وقلت له ما تأجلها لبعدين طالما صحتك الحمد لله كويسة
قال لى متخافش دى عملية سهلة وبسيطة ودلوقتى بتتعمل
والواحد بيخرج بعدها يجرى زى الحصان ،
كنت قلقان مش عارف ليه
فى اليوم ده طلب منى ارسم له صورة للشيخ الشعراوى على لوحة كبيرة
علشان عاوز يعلقها بالمسجد بتاعهم ، يعنى زى نظام مجله حائط ،
وبالفعل رسمت له طلبه بعد كم يوم محمود انهى تجهيز اوراق العلمية
وكمان انهى امتحانات الجامعة اللى كان دايما متفوق فيها
دخل محمود معهد القلب
كنت وقتها بالشغل فى مدينة العاشر من رمضان
ولما عرفت خرجت من شغلى الى معهد القلب فى القاهرة لما دخلت عليه غرفته
لقيته اتعرف على الناس اللى فى الدور كله بالمعهد
والكل بيروح يقعد معه ، ايه يا بنتى ده لحقت فى يومين تعمل علاقات كده ،
حكيت معه شوية وجاء وقت صلاة المغرب وصلى بينا محمود امام للجماعة
وبعد الصلاة جلست معه شوية وبعدين روحت لان المسافة بين البلد والمعهد بعيدة شوية
كانت الزيارة يوم الثلاثاء وتانى يوم اتصلت به ورد عليا اخوه محمد
وقال انه هيعمل العملية بكرة الخميس
اتصلت يوم الخميس واخوه رد عليا
انا : ايه يا محمد الاخبار .. طمنى
محمد : الحمد لله محمود عمل العملية ونجحت الحمد لله
انا : هاطير من الفرح بجد الحمد لله
طيب انا هاجي لكم الليلة .. هاطلع من الشغل على المعهد على طول
محمد : لا مفيش داعى احنا يمكن نيجى البلد بكرة او بعده بالكتير
انا : طيب انا هاتصل بك كل شوية علشان اطمن على محمود
محمد : اوك ومتقلقش
عدى يوم الخميس والجمعة ورحت الشغل يوم السبت
اتصلت بمحمد يوم السبت بعد الظهر وكانو لسة بالمعهد
انا : ايه الاخبار يا محمد
محمد : الحمد لله محمود بخير
انا : هتيجو امتى البلد
محمد : ربنا يسهل يمكن اليوم او بكرة بالكتير
انا فرحان جدا ..
قضيت يوم العمل واخر النهار روحت البيت
امى حضرت لى الاكل وقلت لها بسرعة علشان هاروح اشوف محمود اليوم

ستى ام ابويا كانت قاعدة عندنا بالبيت
ناجى هو انت معرفتش
انا : عرفت ايه يا ستى
مش صاحبك مات النهاردة
انا : صاحبي مين
امى : مفيش حد كمل اكلك يا ناجى ، ده واحد تانى انت متعرفهوش
بعد ما اكلت وخلصت
امي : بص يا ناجى الموت ده بتاع ربنا واحنا ملناش يد فيه
محمود عبدالعزيز صاحبك مات والعزاء بتاعه دلوقتى
انا : ازاى ، انا اتصلت من ساعتين باخوه محمد وقال انه كويس
طلعت من البيت بسرعة ، ورحت بلد محمود ، دخلت الشارع لقيت العزاء
بصراحة مش عارفة حسيت وقتها بايه ، دخلت بدون ما اسلم على احد ،
ومقدرتش امسك نفسى من البكاء ، ووقفت مع اهله وهما بياخده عزاه
كل الاخوة والاصدقاء منهاريين فى البكاء
وقفت مع اهله حتى انتهى العزاء والناس كلها مشيت
وبعدها قعدت مع اصدقائه شوية ومحدش فينا كان عراف يتكلم ولا كلمة
الكل بجد مش قادر يمتلك اعصابه والكل بيبكي
بعدها رحت عند بيت خالى بنفس البلد
خالى: ايه يا ناجي اول مرة اشوفك بتبكي بجد
يا راجل دى ستك ام امك اللى كنت بتموت فيها لما ماتت معملتش كده
فضلت يومين بعد الوفاء بجد مش قادر امسك نفسي من البكاء
حتى وانا فى الشغل تانى يوم العزاء بجد بكيت بالدموع
بعد يومين رحت لاهل محمود البيت
وطلبت منهم اخد اوراق الشعر اللى كتبها
لانى عاوز اعملها على حسابي وهانشرها علشان اخلد ذكراه
لكن للاسف
لقيت المفاجأة
محمود كاتب وصية
منها تحرق جميع اوراقى ومؤلفاتى بعد وفاتى
ولم احصل على اى ورقة تخصه ولا حتى اوراق الديوان اللى كنت هارسم رسوماته

اسأل الله العلي القدير ان يتغمد اخى وصديقي محمود عبدالعزيز برحمته
ويدخله فسيح جناته ، واسالكم جميعا الدعاء له

43 التعليقات:

♥نبع الغرام♥♪≈ يقول...

اوووووووووووووووووووول تعليق حجزززززززززززززززززززززززززززززززززززززززززززز



فوووووووووووووووووو

♥نبع الغرام♥♪≈ يقول...

والتانى كمان بقا


احنا ساعة سحور والواحده لاذم تقوم بالواجب

ههههههههههههههههههه

مي يقول...

هههههههههههههه انوس هنا طيب انا تانى تعليق بقى

مي يقول...

انا جيت اتسحر معاكوووووووووووو
نيهاااااااااااااا

مي يقول...

ازيك يا ناجىىىىىىىىىىى اخبارك ايه يا جميل؟
ماشاء الله عليك يا ناجى بجد انت شخص محبوب واصدقائك بيكونوا زى اخواتك وده انا لمسته بجد فيك
ربنا يرحم محمود ويسكنه فسيج جناته
بس بجد شىء غريب انه كتب وصية بده
وانك بجد كنت ناوى انك تنشر كتاباته وديوانه بجد ده شىء جميل منك
ربنا يخليك لنا اخ وصديق
تحياتى ليك يا جمييييييييل

♥نبع الغرام♥♪≈ يقول...

ياااااااااااااااااه

بجد ابكانى كلامك يا ناجى

حسيت بكل كلمة كتبتها وعشت معاها لحظه بلحظه وكأنها امام عيونى الان

احساس صعب قوووووووووووى
ربنا يرحمه ويجعل مثواه الجنه

ويبدله دارآ خيرآ من داره
وبجد هدعيله بكل لحظه
ربنا يرحمه برحمته الواسعه
دمت بكل خير
مودتى
ايناس

♥نبع الغرام♥♪≈ يقول...

مى

نورتى حبيبتى

هههههههههههههههههههههههههههههه

♥نبع الغرام♥♪≈ يقول...

مى

الاكل جاهز تعالى اتسحرى معانا

ههههههههههههههههههههههه

شبه إنسانه .....( سهوره ) يقول...

الله يرحمه

وينوه قبره

ويظله بظله يوم لا ظل الا ظله

تحياتى

"أحلام حقيقية" يقول...

انك تفقد انسان عزيز عليك شئ صعب والاصعب انك تفقده وانت متاكد انه بخير وانه احسن بكتير فكرتنى بلحظات وفاة اختى كانت بردو فى المستشفى وكان المفروض ترجع على البيت وانا كنت فى مشوار رجعت لقيتها توفيت ربنا يرحمه ويرحم جميع موتى المسلمين اللهم امين ويسكنهم فسيح جناته شئ جميل الوفاء لصديقك طول السنين دى كلها

------ يقول...

كويس والله متأخرتش اوى

التااانية

احجز بقى لغاية ما اقرا وارجع

------ يقول...

انا لله وانا اليه راجعون

نسأل الله ان يرحمه ويسكنه فسيح جناته

------ يقول...

كلماتك مؤثرة والله

وحساها كلها لانها حصلت مع واحدة كنت بحبها جدا

هى ست عجوزة بس قعدت معانا فى البيت 7 سنوات
تخيل مدى الحب

كنت فى يوم عند عمى لقيت الراجل بينادى عليها مكنتش مصدقة

جريت للبيت لقيتهم مشغلين قران
الصدمة مخلتنيش اصدق
سألت امى وكأنى اريدها ان تقول لى لا
اجابت نعم

صمت فترة طويلة ثم حدثتها اين هى قالت هناك فى غرفتها اذهبى وقبليها

بردت اطرافى كنت خائفة كنت اجر قدماى وقفت على باب الغرفة وتسمرت مكانى

وما ان رأيتها على السرير كانت مكفنة الا وفقدت الوعى

وجائنى حالة هستيرية من البكاء
وبقيت على ذلك فترة كبيرة

متذكرة همساتها ضحكاتها غضبها كل شىء صورتها لم تمحى من خيالى

اسأل الله ان يغفر ويرحم كل موتى المسلمييين

غير معرف يقول...

ونزلت دموعى انا ايضا عند
قراءة القصة رغم مرور هذه السنين
الله يرحم محمود رحمة واسعة
وهلت الانوار والبشاير
بقرب المجىء وبالنسبة للعزومة
انا مارجعش فى كلامى ابدا
وجرب وانت تشوف
الحبايب كلهم حيهلو ليا اخ جاى فى
1\9 والتانى 3\9 وناجى العزيز 6\9
صح ربنا يجيبكم كلكم بالسلامة
تحياتى

غير معرف يقول...

ربنا يرحمه

والله موقف مؤثر جدا

وخصوصا انك مطمن عليه وعارف انه بخير وهيرجع بيته وتتفاجأ بخبر مووته صدمة جامدة فعلا :(

دايما بحس من تجاربك انك صديق وفي جدا

يا بخت اصدقائك بيك وانا منهم طبعا :]

الحمد لله انا ليومي هذا محستش بفقدان حد عزيز عليي لكن لو حصل ومات حد عزيز عليي معرفش موقفي هيكون ازاي

ربنا يطول بعمرك وبعمر احبابك

زهور الامل يقول...

عارف
والله العظيم انا لما قرات البوست بكيت

شيء مؤسف جدا وحزن لما تفقد انسان عزيز عليك وبتحبه بجد
بس هي دي ارادة ربنا سبحانه وتعالى
ربنا يتغمده برحمته ويغفر له ويصبرك ويصبر اهله على فراقه

تحياتي

امل يقول...

رغم ان ذكريات الاصدقاء جميله
بس للاسف تاتى احيانا بالدموع والاحزان
الله يرحم صديقك ويرحم جميع حبايبنا اللى سبقوناالى الجنه باذن الله
ودام وفائك واخلاصك
وترجع مصر بالسلامه

ستيتة يقول...

الله يرحمه رحمة واسعة
وربنا يرحم كل الطيبين اللي رحلوا عن دنيانا وسابوا الذكرى الطيبة اللي تخليهم صاحين وأحياء وسطنا

تحياتي

Unknown يقول...

موقف كتير مؤلم ومحزن ومؤثر
حتى كلماتك بجد رائعه ومنتقاه جيداً
يعطيك العافية حبيبي
وربنا يرحمه ويجعل مثواه الجنة

انتظر وجودك عندي يا قمر

محمد المصرى يقول...

قصة جميلة وغريبة ياناجى

بس الموت مادام جه ميعاده خلاص

الموت وحش بس بيستهيالى انت زعلت اوى مش عشان صاحبك فى المقام الاول

بس لانك عرفت الموت وازاى صاحبك محمود روحه تتسرق قدامك

عموما انا طولت جزاك الله كل خير

منى سلام مصرى دائما

assafo anaroze يقول...

يسعد الله مساك
ربنا يرحمه و يغفر له ذنوبه و خطاياه
ربنا يصبر اهله
و انت كمان
يا رب
رمضان كريم

شمس النهار يقول...

جميل ان يتذكر الانسان اصدقائه
وخصوصا من رحل منهم
الله يرحمه وان شاء الله يكون مع الصالحين

صبرني يارب يقول...

الله يرحمه ويغفرله يارب

وتعيش وتفتكر

كل سنه وانت طيب

Unknown يقول...

السلام عليكم ورحمة الله وبركاتة
لا حول ولا قوة الا بالله
وانا لله وانا الية راجعون
معلش ربنا يصبرك انت واهلة
وربنا يرحمة رحمتا واسعة
اللهم امين
كل عام وانت بالف خير

صدى الصمت - عاشقة الورد - يقول...

لا حول ولا قوة الا بالله
وانا لله وانا الية راجعون
ربنا يسكنة فسيح جناتة ويلهم أهلة الصبر والسلوان

Remas يقول...

الله يرحمه

ويتغمده برحمته ويسكنه فسيح جناته


انت مش عارف البوست دا عمل فيا ايه

مؤثر جدا خاصة لمن عانى من فراق اعز الناس على قلبه زيي

لحظات وفاة اختى الله يرحمها من سنتين واللى مش بنساها ابدا واحس بغصة فراقها كل ثانية

انت انسان رائع يا استاذ ناجى صديق بمعنى الكلمة ربنا يكرمك

كتكوته يقول...

الله يرحمه ويسكنه فسيح جناته
وواضح جدا حبك واخلاصك لاصدقائك

تقبل مروري البسيط

ليس فقيرا من يحب يقول...

ربنا يرحمه ويغفر له

ويجعل الجنه مثواه

اسفه على التأخير يا استاذ ناجى

يارب تكون بخير

اقصوصه يقول...

تدوينه موفقه :)

غير معرف يقول...

استاذ ناجى
انا جاية اطمن على سلامة وصولك
يارب تكون وصلت بالف خير
وتكون بتقضى اجمل الايام وسط
اسرتك الصغيرة والاسرة الكبيرة ايضا
وشكل الانوار هلا لغاية عندى
وباذن الله نقولك نورت مصر ثم الشرقية
بس ياريت تطمنا عليك
تحياتى

غير معرف يقول...

طبعععععا ياعم رايق وفايق ولا احنا ببالك

من لقى احبابه نسي اصحابه ^ـ*

عذرينك ياعم الحج بس ابقى طمنا عنك

ربنا يوفقك يارب ويجعل ايامك كلها سعادة

دمت بالف خير

مي يقول...

ايه الغيبة دى طاااايب يارب تكون بخير تبقى طمنا عليك بس
سلالالالالالالام

mahasen saber يقول...

ا حول ولاا قوة الا بالله
يا حبيبى يا ابنى اصر يعمل العمليه عشان بس تخفض المصروفات واهى سبحانك يا رب

ربنا يرحمه برحمته الواسعه ويصبر اهله ويسكنه فسيح جناته

انا حسيت من كلامك بطيبة محمود قوى قوى وبصبره

ربنا يرحمه برحمته الواسعه ويصبر والدته
اللهم امين

ويصبرك انتا كمان با ناجى
ويكرمك لانك نعم الصديق الوفى

ربنا يرحمه ويثبته ويكتب مثواه الجنه

♥نبع الغرام♥♪≈ يقول...

بخخخخخخخخخ
انت فين كل ده

يارب تكون بخير ووصلت بالسلامه
ربنا يطمنا عليك
وكل سنه وحضرتك واسرتك بالف خير وصحه

طمنى عليك

ايناس

assafo anaroze يقول...

يسعد الله مساك
احل علينا و عليكم العيد يا رب يتقبل منا و منك شهر الصيام من صلاة و ركوع و قيام و سائر العبادات و المعاملات
عيد سعيد على الجميع و يا رب تكون بالف خير

هــــــــــــايدي يقول...

السلام عليكم ورحمه الله وبركاته
الاول ازيك
وكل سنه وانت طيب
عيد سعيد عليك


ممممممم
ربنا يتفقد صحبك برحتمه ويدخله جنته
ادعيله ديما وافتكره بالخير دا هيرفعه عند ربنا

غير معرف يقول...

عيد مبارك وسعيد
عليك وعلى اسرتك الكريمة
وياريت تطمنا عليك
وكل عام وانتم بخير
تحياتى

Unknown يقول...

الف رحمة ونور
له هو وامى وابويا
وأموات المسلمين أجمعين
عمليات القلب كدهـ:
خداعة جداً ممكن يخرج
منها المريض لكن
اى مضاعافات
ممكن تحصل وتقلب الدنيا
الله يرحمه وحتفضل سيرته حلوة
ويفضل ذكره حسن بعمله وبأخلاقه
وبحسن أختياره للمخلصين من أصدقائه.

Unknown يقول...

طمنا عليك ياأستاذ ناجى طولت الغيبة المرة دى يارب تكون بخير والاسرة بخير كمان

♥نبع الغرام♥♪≈ يقول...

hالحمد لله انا مبسوطه انى اطمنت عليك من نوارة ويارب تكون بالف خير
وترجع تنور مدونتك من تانى

ربنا يسمعنا عنا كل الخير يارب
مودتى
ايناس

صدى الصمت - عاشقة الورد - يقول...

السلام عليكم
لماذا كل هذة الغيبة الطويلة
لعل المانع خير إنشاءالله
فى إنتظار كتاباتك الرائعة
تحياتى

هــــــــــــايدي يقول...

السلام عليكم ورحمه الله وبركاته
انت فين من زمان
يارب تكون بخير
طمنى عليك

ليس فقيرا من يحب يقول...

خير يا استاذ ناجى

ليه الغيبه دى كلها

يارب تكون بخير