صعبان عليا حالنا ؟؟؟؟!!!!!

من يومين اتصلت بام عبدالرحمن كان يوم الخميس اللى فات الصباح باطمن عليها وعلى الاولاد
لقيتها فرحانة قوى وبتقول لى مبروك
على ايه يابنتى
لقيتى لى عروسة ولا ايه ههههههه
قالت قبلوا النقض فى قضية هشام طلعت مصطفي
الف مبروك يا ستى
وفرحانة قوى علشانه
قالت انا فرحانة لانه مش هيتعدم فى واحدة زى دي
ومش فرحانة ان هو واللى زيه سبب فى غربتنا عن بلدنا
لقيتها سكتت
الموضوع ده فكرت فيه كتير واكيد ناس زيي فكروا فيه
ياترى مصر فقيرة بجد علشان انا واللى زيي من الشباب يتحرموا من اهلهم
كل يوم بل كل ساعة بنشوف على القنوات الفضائية هموم ومشاكل الشعب المصري
وفقره والعيشة اللى عايشنها
طيب والملايين اللى بتترمى على الارض
فى لاعب كورة او في حتى رقاصة او وحدة ساقطة
هى بجد مش ملايين ولا انا مش عارف حاجة ولا ايه بالضبط
انا زهقت اتفرج على برامج تليفزيون بالشكل ده لان كلها واحد
الحل ايه
نبنى مصر ازاى
وفيه ناس بتهد
بتهد مبادئ وقيم
بتسرق رموز واعلام وثقافات
وبتسرق آثار بلدنا رغم انهم من اغنياء البلد واللى عندهم مكفيهم وزيادة
مراكز مرموقة بالدولة ووظائف عالية جدا واموال لا تعد ولا تحصي
وبتسرق دم الشعب " الشعب اللى بيطلع روح اهله علشان بس يلاقي لقمة العيش الحاف" ده لو لقاها اصلا

فيه مظاهرات وفيه اعتصامات وفيه حاجات كتير بتوحى برفضنا للى بيحصل
لكن النهاية ايه
هنفضل متغربيين لحد امتى
امتى هتحس بلدنا بينا
امتى هنعيش فيها زي بقية الشعوب اللى عايشة بارضها و......
الكلام كتير بس مفيش داعى لان الكل عارف انا عاوز اقول ايه

مجرد فكرة جت لى قلت افضفض لنفسي شوية